Харанхуйн хунтайж, хүнд металлын загалмайлсан эцэг гэгддэг Оззи Осборны сүүлчийн тоглолтынхоо үеэр ашигласан сэнтийг Бирмингемд болох дуучны нас барсны нэг жилийн ой хүрээнд зохион байгуулах арга хэмжээний үеэр олон нийтэд үзүүлэхээр төлөвлөжээ.
Тодруулбал, хар өнгөтэй, готик хэв маягийн эл сэнтийг ирэх долдугаар сарын 1-нээс Бирмингемийн музей, урлагийн галерейд болох “Ozzy Osbourne: Working Class Hero” үзэсгэлэнд толилуулахаар болсон байна.
Оззи Осборн энэхүү сэнтийгээ 2025 оны долдугаар сард “Вилла Парк”-т болсон “Black Sabbath” хамтлагийн үдэлтийн тоглолтын үеэр ашигласан юм.
“Ozzy Osbourne: Working Class Hero” үзэсгэлэнд дээр дурдсан сэнтийгээс гадна хөгжимчний амьдрал, карьерыг илэрхийлэх хувийн дурсгалын зүйлс, гэрэл зураг, шагналуудын цуглуулга багтах аж. Өөрөөр хэлбэл, эл үзэсгэлэнгээр Оззи Осборны бага наснаас авахуулаад дэлхийн хамгийн нөлөө бүхий рок оддын нэг болсон түүхээр аялуулах юм байна.
