Өвөр Монголын Улаанцав хотын хээр тал, Лаоли нуурын эрэгт “Prairie Ark” галерей нээгджээ. Уг галерей нь “Büro Ziyu Zhuang” студийн гүйцэтгэсэн төсөл аж.
Галерейн хувьд интерактив дээвэртэй ба зочид зүлэгнээс барилгын шаталсан дээвэр рүү шууд алхан гарч, дээд хэсгийн задгай амсраар дотогш нэвтрэн орно. Дотоод орон зайн хувьд 1,360 ам.метр талбай бүхий олон үйлдэлт танхимтай бөгөөд сараалжин тааз болон дээрээс тусах байгалийн гэрэл нь орон зайг улам уудам харагдуулна. Доторх талбайг задгайгаар шийдэж, урлагийн үзэсгэлэн, брэндийн арга хэмжээ болон олон нийтийн цугларалт тогтмол зохион байгуулан ажиллаж байна.
“Büro Ziyu Zhuang” студийн үүсгэн байгуулагч, ерөнхий архитектор Зиюу Жуан “Барилга барихад эхлээд орчноо сайтар мэдрэх хэрэгтэй. Орон зайн онцлогоо ойлгож, яг тэр мэдрэмжид өгүүлэмж нь таарсан барилга барих нь чухал байдаг. Энэ төслийн хувьд Лаоли нуурын эргийн хээр талд улиг болсон сонголтуудаас татгалзахыг хичээсэн буюу гэр, нүүдэлчин ахуй, эсвэл Чингис хаан гэх мэт тал нутгийг илэрхийлдэг элементүүдийг өнгөцхөн, зүгээр нэг давтахыг хүсээгүй. Харин байгалийн нэг хэсэг юм шиг хэр нь онцгой, содон байх зураг гаргахыг зорьсон” хэмээжээ.
