Нүүдэлчин монголчуудын оршихуйн үндэс болсон адуу, түүнийг дагасан соёлын баялаг уламжлал, уран дархчуудын ухаан, мэлмий, гарын ураар бүтсэн адуун соёлын тоног хэрэгслийг цогцоор нь сурталчлан таниулах зорилгоор “Монгол дархан-Адуун соёл” тусгай үзэсгэлэнг “Чингис хаан” үндэсний музейд нээлээ.
НҮБ-ын Ерөнхий Ассамблей өнгөрсөн онд Монгол Улсын Ерөнхийлөгчийн санаачилсан “Дэлхийн адууны өдрийн тухай” тогтоолыг хэлэлцэн баталсан. Үүнтэй уялдуулан “Дэлхийн адууны өдөр”-ийг хоёр дахь жилдээ, “Монгол дархны өдөр”-ийг анх удаа тэмдэглэх хүрээнд энэхүү үзэсгэлэнг олон нийтэд дэлгэж байгаа нь энэ юм. Үзэсгэлэнг Ерөнхийлөгчийн Тамгын Газар, ССАЖЗЯ, “Түмэн эрдэнэс” нэгдсэн холбоо, “Чингис хаан” үндэсний музей хамтран зохион байгуулж бөгөөд 101 дархан урлаачийн 205 шилмэл, сор бүтээлээр олны мэлмийг баясгаж байна.
Монгол дархны урлагийг дэмжих тухай Ерөнхийлөгчийн зарлиг 2016 онд гарч, улмаар дархчуудын үзэсгэлэнг гурван жил тутам уламжлал болгон зохион байгуулсаар ирсэн. Тэгвэл уг үзмэрүүдийг маргаашийг дуустал олны хүртээл болгож байна.
Энэхүү үзэсгэлэнгийн албан ёсны нээлтийн үеэр жил бүрийн долоодугаар сарын 8-ныг “Монгол дархчуудын өдөр” болгон зарлаж, тогтоолыг гардуулав. Ингэснээр дархчууд жил бүрийн долоодугаар сарын 8-нд бүтээлээ, бүтээлчдээ, өв соёлоо алдаршуулах өдөртэй болж байна.
