Францын жүжигчин Ева Грийн “HBO Max”-ийн шинээр бүтээж буй “Harry Potter” цувралд Волдемортын үнэнч дагагч Беллатрикс Лестрейнгийн дүрийг бүтээх гол нэр дэвшигчдийн нэг болжээ.
Мексикийн “Excélsior” сонины мэдээлснээр “HBO Max” болон Ева Грийн нарын хооронд дүрийн талаар урьдчилсан хэлэлцээ явагдаж байгаа бөгөөд жүжигчин уг дүрийн гол нэр дэвшигчээр яригдаж байна. Гэхдээ “HBO Max” болон жүжигчний тал уг мэдээллийг одоогоор албан ёсоор батлаагүй байна.
Беллатрикс Лестрейн нь Ж.К.Роулингийн зохиолын ертөнц дэх хамгийн аюултай Хар хүчний шидтэнүүдийн нэг бөгөөд Волдемортын үнэнч дагагч юм. Өмнөх “Harry Potter” кинонуудад уг дүрийг Хелена Бонэм Картер бүтээж, мартагдашгүй дүрийн нэг болгосон билээ.
Харин Ева Грийн өмнө нь “Dark Shadows”, “Miss Peregrine’s Home for Peculiar Children”, “Dumbo”, “300: Rise of an Empire”, мөн “Penny Dreadful” зэрэг бүтээлд нууцлаг, харанхуй өнгө аястай дүрүүдийг бүтээж байсан. Тиймээс түүнийг Беллатриксийн дүрд тохирох жүжигчин хэмээн шүтэн бишрэгчид цахим орчинд идэвхтэй хэлэлцэж байна.
Шинэ “Harry Potter” цуврал нь Роулингийн долоон номыг телевизийн олон ангит форматаар дахин өгүүлэх бөгөөд эхний улирал “Harry Potter and the Philosopher’s Stone” зохиолоос эхэлнэ. Беллатриксийн дүр цувралын дараагийн улирлуудад гарах юм.
Гэхдээ одоогоор Ева Грийн Беллатриксийн дүрд албан ёсоор сонгогдсон гэх баталгаа байхгүй бөгөөд энэ мэдээллийг цуурхал, урьдчилсан кастингийн мэдээ гэж үзэх нь зүйтэй.
