Америкийн жүжигчин, реппер, продюсер Уилл Смит 1968 оны энэ өдөр буюу есдүгээр сарын 25-нд Пенсильвани мужийн Филадельфи хотод Уиллард Кэрролл Смит Жуниор нэрээр төржээ.
Тэрбээр хөгжмийн ертөнцөд рэп уран бүтээлчээр танигдаж эхэлсэн ч удалгүй телевиз, кино урлагт амжилттай хөл тавьж, Холливудын хамгийн алдартай жүжигчдийн нэг болсон юм.
Смит 12 настайгаасаа рэп хөгжим сонирхож, 16 настайдаа Жефф Таунстай танилцан “DJ Jazzy Jeff & The Fresh Prince” хэмээх хослолыг байгуулжээ. Тэд 1986 онд “Girls Ain’t Nothing But Trouble” дуугаараа олны анхаарлыг татаж, 1989 онд “Parents Just Don’t Understand” дуугаараа “Грэмми”-гийн шилдэг рэп тоглолтын анхны шагналыг хүртсэн байна. Мөн “Summertime” дуугаараа дахин “Грэмми” хүртжээ.
1990 онд Смит NBC телевизийн “The Fresh Prince of Bel-Air” инээдмийн цувралын гол дүрд тоглосноор жүжигчний карьер нь эрчимтэй хөгжсөн байна. Филадельфиас Лос-Анжелес хотод чинээлэг хамаатнуудынхаа гэрт очиж амьдрах өсвөр насны хүүгийн тухай тус цуврал зургаан улирал үргэлжилж, Смитийг телевизийн од болгожээ. Тэрбээр уг дүрээрээ “Алтан бөмбөрцөг”-ийн шагналд хоёр удаа нэр дэвшсэн байна.
Удалгүй тэр телевизээс том дэлгэц рүү шилжиж, 1995 онд “Bad Boys”, 1996 онд “Independence Day” кинонд тоглосноор Холливудын эрэлттэй жүжигчдийн нэг болов. 1997 онд “Men in Black” кинонд Агент Жейгийн дүрийг бүтээж, олон улсын хэмжээний одын байр сууриа бататгасан юм.
Смит зөвхөн тулаант болон инээдмийн кинонд тоглоод зогсохгүй драмын дүрүүдээрээ ч өндөр үнэлгээ авчээ. 2001 онд “Ali” кинонд домогт боксчин Мухаммед Алигийн дүрийг бүтээж, “Оскар”-ын шилдэг эрэгтэй жүжигчний төрөлд анх удаа нэр дэвшсэн байна.
Үүний дараа 2006 оны “The Pursuit of Happyness” кинонд хүү Жейден Смиттэйгээ хамт тоглож, амьдралаа шинээр эхлүүлэхийг зорьж буй аавын дүрийг бүтээсэн юм. Тус дүрээрээ тэрбээр “Оскар”-ын шилдэг эрэгтэй жүжигчний төрөлд дахин нэр дэвшжээ.
Түүний гол бүтээлүүдийн дунд “I, Robot”, “Hitch”, “I Am Legend”, “Hancock”, “Seven Pounds”, “Suicide Squad”, “Aladdin” зэрэг кино багтдаг. 2019 онд “Aladdin” кинонд Жиннигийн дүрийг бүтээсэн бөгөөд тус кино дэлхий даяар нэг тэрбум ам.доллараас давсан орлого олсон байна.
2021 онд Смит “King Richard” кинонд теннисний алдарт тамирчид Венус, Серена Уильямс нарын эцэг, дасгалжуулагч Ричард Уильямсын дүрийг бүтээжээ. Түүний тоглолт өндөр үнэлгээ авч, 2022 онд “Оскар”-ын шилдэг эрэгтэй жүжигчин шагналыг хүртсэн байна.
Энэ дүрээрээ тэр мөн “Алтан бөмбөрцөг”, BAFTA болон SAG Awards-ийн шилдэг эрэгтэй жүжигчний шагналуудыг хүртсэн юм.
Жүжигчний карьертаа анхаарч байсан хэдий ч Смит хөгжмөө бүрэн орхиогүй. 1997 онд “Big Willie Style”, 1999 онд “Willennium”, 2002 онд “Born to Reign”, 2005 онд “Lost and Found” цомгуудаа гаргажээ.
Харин 20 жилийн завсарлагааны дараа 2025 онд “Based on a True Story” нэртэй тав дахь студийн цомгоо гаргасан байна. Тус цомогт хүү Жейден Смит болон өмнөх уран бүтээлийн хамтрагч DJ Jazzy Jeff нартай хамтарсан бүтээлүүд багтжээ.
