“Харри Поттер” цуврал кинонд Рон Уизлигийн дүрийг бүтээсэн жүжигчин Руперт Гринт талийгаач жүжигчин Алан Рикманыг дурсаж, түүний хүнлэг зан чанар, залуу жүжигчдэд тавьдаг байсан халамж анхаарал одоо ч өөрт нь урам зориг өгдөг хэмээн ярьжээ.
38 настай Руперт Гринт арваннэгдүгээр сарын 9-нд Лондонд болсон “Ebenezer” киноны нээлтийн үеэр “MTV UK”-д ярилцлага өгөхдөө өөрт нь урам зориг өгч, үргэлж дэмжиж ирсэн хүмүүсийн талаар дурдсан байна. Тэрбээр “Харри Поттер” киноны зураг авалтын үеэр хамтран ажилласан олон гайхалтай жүжигчнээс Алан Рикман онцгой байр суурь эзэлдэг гэдгийг онцолжээ.
Түүний хэлснээр Рикман дэлгэцийн бүтээлд профессор Северус Снэйпийн дүрээр хатуу ширүүн, нууцлаг нэгэн мэт харагддаг байсан ч бодит амьдрал дээр залуу жүжигчдэд маш эелдэг, халамжтай ханддаг хүн байжээ.
Руперт Гринт “Тэр үнэхээр онцгой хүн байсан. Бас бидэнд маш их анхаарал халамж тавьдаг байлаа. Киноны зураг авалт дууссаны дараа ч бидэнтэй холбоотой байж, бидний уран бүтээлийн замналыг үргэлж сонирхож явсан” хэмээн ярьсан байна.
Алан Рикман “Харри Поттер” цувралын найман ангид профессор Северус Снэйпийн дүрийг бүтээсэн бөгөөд Руперт Гринт Рон Уизлигийн дүрээр түүнтэй 2001-2011 оны хооронд хамтран ажиллажээ. Рикман 2016 оны нэгдүгээр сарын 14-нд нойр булчирхайн хорт хавдрын улмаас 69 насандаа таалал төгссөн юм.
