2006 оны наймдугаар сарын 7-нд үүсгэн байгуулагдаж, хошин урлагийн тоглолтууд, дэлгэцийн уран бүтээлүүдийг үзэгчдэдээ хүргэсээр ирсэн “Маск” продакшны 20 жилийн энэ онд тохиож буй.
Тэгвэл тус продакшн эл ойдоо зориулан “Сүүлчийн шилийн сайн эрс” уран сайхны кино бүтээсэн нь тус хамт олны хамгийн сүүлчийн уран бүтээл болохыг зарлалаа. Тодруулбал, “Маск” продакшны захирал, Гавьяат жүжигчин П.Эрдэнэзаан NTV телевизийн “Алтан Маск” нэвтрүүлэгт оролцох үеэрээ эл мэдэгдлийг хийсэн юм.
Тус продакшн өнгөрсөн 20 жилийн хугацаанд “Инээхэд зиндаа хэрэггүй”, “Mask Show”, “Их хотын жиргээ”, “Масктай Монгол” гэхчилэн тоглолтуудыг тайзнаа тавьжээ. Мөн “Би гишүүн баймааргүй байна”, “No Wifi Zone”, “Баярлалаа, Ааваа” зэрэг контонт, түүнчлэн “Хайр, харуусал”, “Соёлын довтолгоо” бүрэн хэмжээний уран сайхны киног үзэгчдийн хүртээл болгож байв.
Ташрамд дурдахад, “Маск” продакшны хамгийн сүүлчийн уран бүтээл болох “Сүүлчийн шилийн сайн эрс” уран сайхны кино яг одоо кинотеатруудаад үзэгчдэд хүрч буй. “Маск” продакшн, “Reaction” продакшн, “Милл” кино компанийн хамтын бүтээл “Сүүлчийн шилийн сайн эрс” киноны зохиолыг Д.Мөнхбат, Т.Цолмон, А.Баяртсайхан нар хамтран бичиж, ерөнхий продюсероор Х.Цасчихэр, ерөнхий найруулагчаар Д.Мөнхбат ажиллажээ.
