Батмөнх Даян хааны төрийн үйл хэрэг, эв нэгдлийг бэхжүүлэхэд оруулсан хувь нэмрийг олон нийтэд таниулах зорилгоор “Далай бишрэлт Даян хаан” дууг бүтээж дүрсжүүлэн олны хүртээл болголоо.
Уран бүтээлийн нээлтийг өчигдөр /2026.09.21/ Даланзадгад хотын Нутгийн удирдлагын ордны өмнөх талбайд байдаг Батмөнх Даян хааны хөшөөнд хүндэтгэл илэрхийлж, цэцэг өргөх үеэр хийжээ.
Даян хаан 47 жил төр барихдаа Монголын дотоодын бутрал, зөрчлийг намжааж, улс орны нэгдмэл байдлыг бэхжүүлэхэд чухал үүрэг гүйцэтгэсэн хэмээн түүхэн сурвалж, судалгаанд тэмдэглэдэг.
Түүний төрсөн нутаг хэмээн үздэг Өмнөговь аймагт Даян хааны түүх, төрийн үйл хэргийг судлах, хойч үед өвлүүлэхэд чиглэсэн ажлуудыг хийж байна. Тухайлбал, аймгийн ИТХ болон Батмөнх Даян хааныг алдаршуулах нийгэмлэг хамтран эрдэм шинжилгээний бага хурал зохион байгуулах, Даян хааны нэрэмжит шагнал бий болгох зэрэг ажлыг хэрэгжүүлжээ.
Үүний зэрэгцээ Даян хааны түүх, төрийн үйл хэргийг уран бүтээлээр хүргэх зорилгоор “Далай бишрэлт Даян хаан” дууг бүтээсэн байна. Дууны шүлгийг Төрийн шагналт, Монгол Улсын Соёлын гавьяат зүтгэлтэн Ш.Гүрбазар, хөгжмийг Монгол Улсын Ардын жүжигчин, Төрийн хошой шагналт Н.Жанцанноров зохиожээ. Өмнөговь аймгийн Хөгжимт жүжгийн театрын гоцлол дуучин Э.Цогтбаяр уг дууг дуулж, дүрсжүүлсэн байна.
Даланзадгад хотын Нутгийн удирдлагын ордны өмнөх талбайд байдаг Батмөнх Даян хааны хөшөөг 2013 онд түүний дурсгалыг хүндэтгэх, түүх, өв соёлыг хойч үед өвлүүлэх бэлгэдэл болгон бүтээн босгожээ.
