“Оскар”-ын хоёр удаагийн шагналт жүжигчин Кейт Бланшетт театрын тоглолтын үеэр гар утсаараа бичлэг хийхгүй байхыг үзэгчдээс хүсчээ. Австралийн жүжигчин Бланшетт Лондон хотын Үндэсний театрт “Electra/Persona” жүжигт тоглож буй юм. Тэрбээр өнгөрсөн баасан гараг /2026.09.18/-т болсон тоглолтын төгсгөлд тайзан дээрээс үзэгчдэд хандан, театр бол хүмүүс утас болон бусад зүйлд сатааралгүйгээр нэг дор цуглаж, тоглолтыг хамтдаа мэдрэх цөөн газрын нэг гэдгийг хэлжээ.
Мөн тэрбээр “Тоглолтын төгсгөлд жүжигчдийн бичлэгийг хийх нь бидэнд таатай санагдаж болох ч жүжгийн үеэр бичлэг хийхгүй байхыг хүсье. Энэ нь дараагийн үзэгчдэд тоглолтыг бүрэн мэдрэх боломжийг алдагдуулдаг” гэж хэлсэн байна. Бланшеттийн энэ үгийг үзэгчид алга ташилтаар хүлээн авчээ.
Театрт байсан нэгэн үзэгчийн мэдээлснээр, Бланшетт жүжгийн үзэгдэл хоорондох завсарлагааны үеэр нэг хүн бичлэг хийж байгааг анзаарсан байна. Тухайн үед жүжигчид тайзан дээр байсан бөгөөд нүүр будалтаа хийж, ажилтнууд тайзыг цэвэрлэж байжээ. Бланшетт бичлэг хийж буй хүнийг хараад тайзны урд хэсэгт очин, хуруугаараа “үгүй” гэсэн дохио өгсөн байна. Улмаар тоглолтын төгсгөлд үзэгчдэд энэ талаар дахин сануулжээ.
“Electra/Persona” жүжиг нь найруулагч, зохиолч Бенедикт Эндрюсийн бүтээл юм. Энэ нь эртний Грекийн алдартай зохиолч Софоклын “Электра” эмгэнэлт жүжиг болон Шведийн найруулагч Ингмар Бергманы “Persona” киног нэгтгэсэн бүтээл юм.
Жүжиг аравдугаар сарын 10 хүртэл тоглогдох бөгөөд Бланшетт жүжигчин Нина Хосстой хамт гол дүрүүдийг хуваан бүтээж байна. Аль жүжигчин ямар дүрд тоглохыг тоглолт бүрийн өмнө тайзан дээр зоос шидэж шийддэг ажээ.
