Жүжигчин Мелисса МакКарти инээдмийн киноны од гэдгээрээ илүү танигдсан ч энэ удаад бодит эмгэнэлт хэргээс сэдэвлэсэн “The Murder of JonBenét Ramsey” цувралд дүр бүтээжээ. Тэрбээр “Netflix”-ийн шинэ бүтээлд 1996 онд амиа алдсан зургаан настай ЖонБенет Рэмсигийн ээж Пэтси Рэмсигийн дүрийг бүтээсэн байна.
МакКарти “Variety”-д өгсөн ярилцлагадаа уг дүрд тоглох нь өөрт нь сэтгэлзүйн хувьд хүнд байсан талаар ярьжээ. Зураг авалтын талбайд хүнд, сэтгэл хөдөлгөм хэсгүүдийн үеэр жүжигчид болон багийнханд туслах зорилгоор сэтгэлзүйч байнга ажиллаж байсан гэж МакКарти хэлжээ.
ЖонБенет Рэмси 1996 оны Зул сарын баярын шөнө Колорадо мужийн Боулдер хот дахь гэрийнхээ хонгилд нас барсан байдалтай олдсон бөгөөд энэ хэрэг өнөөдрийг хүртэл бүрэн тайлагдаагүй хэвээр байна. Хэргийг дагасан хэвлэл мэдээллийн асар их анхаарал, гэр бүлийнхэнд ирсэн олон нийтийн дарамт, сэжиглэлүүдийг шинэ цувралд үзүүлжээ.
“The Murder of JonBenét Ramsey” нь Ричард ЛаГравенезегийн бүтээсэн цуврал бөгөөд МакКартигийн хамт Клайв Оуэн Жон Рэмсигийн дүрд тогложээ. Мөн Гаррет Хедлунд, Элисон Пилл, Шиа Уигэм, Уилл Паттон зэрэг жүжигчид оролцсон байна.
Тус цуврал 2026 оны арванхоёрдугаар сарын 10-нд “Netflix”-ээр дэлхий даяар нээлтээ хийнэ.
