Монголын театрын урлагийг дэлхийд сурталчилж буй Хөдөлмөрийн баатар, Ардын уран зохиолч Б.Лхагвасүрэнгийн зохиол “Тамгагүй төр” буюу “Монгол хаан” жүжгийг есдүгээр сарын 19, 20-ны өдрүүдэд ОХУ-ын алдарт Марийнский театрын Приморскийн тайзнаа тоглосон.
Тэгвэл эл жүжгийн орос хэл дээрх орчуулгыг Ерөнхий сайд асан С.Баяр хийсэн бөгөөд энэхүү орчуулга оросын үзэгчид, театрын мэргэжилтнүүдийн зүгээс өндөр үнэлгээ, сайшаал хүртээд байна.
Энэ талаар “Hero entertainment”-ийн захирал, найруулагч Б.Баатар цахим хуудсандаа “С.Баяр сайд зохиолч Б.Лхагвасүрэнтэй олон жилийн дотно нөхөрлөлийн харилцаатай байсан төдийгүй уг бүтээлийн агуулга, үзэл санаа, зохиолчийн уран бүтээлийн ертөнцийг сайн мэддэг нэгэн. Тиймээс зохиолыг зөвхөн хэлний хувьд бус, утга санаа, уран сайхны мөн чанарыг нь хадгалан орчуулахад энэ ойлголт, мэдлэг нь чухал нөлөө үзүүлсэн болов уу!
Найруулагчийн хувьд хүндэлдэг улс төрч, түүхэн хүнээр энэ бүтээлийг орчуулуулсан нь миний хувьд нэр төрийн хэрэг төдийгүй аз завшаан байлаа.
Ерөнхий сайд асан С.Баяр бол монгол уран бүтээл Лондон хотын Вест-Эндийн тайзнаа төдийгүй дэлхийн тайзнаа тоглохын ач холбогдлыг сайн ойлгож, дэмжиж ирсэн!
Тэрбээр өндөр мэдрэмж, өргөн сэтгэлгээтэй, орчин үеийн үндэсний сэхээтэн хүн билээ” хэмээн нийтэлжээ.
