“Баян аниа” инээдмийн уран сайхны кино өнгөрсөн баасан гараг /2026.09.25/-аас олны хүртээл болж эхлээд буй. Уг киноны гол дүрд залуу жүжигчин Д.Дөлгөөншүр тогложээ.
Цахим орчинд Хоронзон гишүүн гэх дүрийг бидний хэзээний танил мэт болтол хоногшуулсан залуу жүжигчин Д.Дөлгөөншүр Улаанбаатар хотод төрж, Баянхонгор аймагт өсжээ. Хоёрдугаар ангийн сурагч байхдаа “Уран жиргээ” уран уншлагын улсын уралдаанд түрүүлж, түүнээс хойш урлагтай холбогдон, театрт л өнждөг хүүхэд байжээ. Тэрбээр СУИС-ийг 2022 онд найруулагч мэргэжлээр төгссөн бөгөөд Урлагийн гавьяат зүтгэлтэн, найруулагч Ч.Найдандоржийн шавь. Сургуулиа төгссөнөөс хойш МҮОНРТ-ийн “Өглөөний хөтөлбөр”-т ассистент найруулагч, Монголын радиод нэвтрүүлэгч, NTV телевизэд эвлүүлэгч зэрэг ажлууд хийж байжээ. Харин өөрөө жүжиглэх дуртай учир видео контент хийхээр шийдээд мэргэжил нэгт үеийн залуустайгаа хамтран контент хийж эхэлсэн нь түүнийг олон нийтэд таниулаад буй юм.
“Баян аниа” инээдмийн уран сайхны киноны зохиолыг Э.Баасандорж бичиж, О.Сэргэлэн найруулжээ. Дүрүүдэд Д.Дөлгөөншүрээс гадна жүжигчин Р.Сүхболд, Ж.Мөнхсайхан, Х.Цасчихэр, Н.Энхзаяа, М.Саранцэцэг нар тогложээ.
