Британийн дуучин Эд Ширан АНУ-ын Массачусетс мужид хийхээр төлөвлөж байсан дараагийн хоёр тоглолтоо цаг агаарын аюултай нөхцөл байдлын улмаас цуцалжээ.
Тэрбээр Бостоны ойролцоох Фоксборо хотын “Gillette Stadium”-д баасан болон бямба гарагт тайзнаа гарахаар төлөвлөж байсан юм. Гэвч Шинэ Английн бүс нутагт хүчтэй шуурга, салхины сэрэмжлүүлэг зарласантай холбоотойгоор орон нутгийн албаныхантай зөвлөлдсөний эцэст хоёр тоглолтыг цуцлах шийдвэр гаргасан байна.
Зохион байгуулагчдын мэдээлснээр үзэгчид, уран бүтээлчид болон тоглолтын ажилтнуудын аюулгүй байдлыг нэн тэргүүнд тавьж ийм шийдвэр гаргажээ. Тус бүс нутагт хүчтэй салхи үргэлжлэх төлөвтэй байгаа тул иргэдэд шаардлагагүй тохиолдолд зорчихгүй байхыг мөн зөвлөсөн байна.
Цуцлагдсан тоглолтын тасалбарын төлбөрийг худалдан авсан газраар нь дамжуулан буцаан олгоно. Харин Ticketmaster-аар тасалбар авсан хүмүүсийн мөнгийг автоматаар буцаан шилжүүлэх аж.
Эд Ширан одоогоор АНУ дахь аялан тоглолтоо үргэлжлүүлж байгаа бөгөөд Массачусетсийн хоёр тоглолт цуцлагдсан ч дараагийн хуваарьт тоглолтуудын талаар өөрчлөлт зарлаагүй байна.
