Хятадын Шанхай хотод “WorldSkills Shanghai 2026” дэлхийн ур чадварын олимпиад болж өндөрлөлөө.
Дөрвөн өдөр үргэлжилсэн энэхүү уралдаанд 70 гаруй орны шилдэг 1400 орчим оролцогч 64 төрлөөр ур чадвараа сорьжээ. Мэргэжлийн болон техникийн боловсролын тогтолцоо, сургалтын чанар, ур чадварын түвшнээ харьцуулан үнэлж, цаашид стандартаа хэрхэн ахиулах боломж, чиглэлээ тодорхойлох томоохон талбар болсон 68 дахь удаагийн тэмцээнд Монгол Улсаас 12 залуу мэргэжилтэн ур чадвараа сорьсон байна. Энэхүү тэмцээний гагнуурын төрөлд өрсөлдсөн Г.Номин “Best of Nation Award” шагналын эзэн болсон бөгөөд монгол улсын баг тамирчдаас хамгийн өндөр гүйцэтгэлтэй оролцогчоор тодорчээ. Түүнчлэн CNC токарийн төрөлд оролцогч С.Эрхэмбилэг нөхөрсөг тэмцээнд мөнгөн медаль хүртсэн байна.
Энэ удаагийн тэмцээнд ур чадвар, орчин үеийн технологи, инновацыг хослуулсан үзүүлбэрүүд багтсан бөгөөд ур чадвар нь технологийн хөгжил, үйлдвэрлэл, хөдөлмөрийн зах зээл болон залуучуудын карьерын хөгжилтэй салшгүй холбоотой болохыг харуулжээ. Мөн хүн, хиймэл оюун ухаан, робот технологийн хамтын ажиллагааг харуулсан үзүүлбэрээр хүний ур чадвар болон технологийн дэвшлийн уялдаа холбоог онцоллоо. Түүнчлэн таван тивийн залуус ур чадвар эзэмшсэн туршлага, мэргэжлийн хөгжлийн талаарх түүхээ хуваалцсан нь ур чадварын боловсрол нь залуучуудын хөгжил, хөдөлмөр эрхлэлт, ирээдүйн боломжид чухал ач холбогдолтойг илэрхийлэв.
