Монгол Улс, БНХАУ-ын найрсаг харилцаа, хамтын ажиллагааг бэхжүүлэх, биеийн тамир, спортын салбарын хөгжилд бодит хувь нэмэр оруулах томоохон бүтээн байгуулалтын нэг болох Монгол, Хятад хоёр улсын төрийн тэргүүн нарын нэрэмжит “Президент” спорт цогцолборын барилгын ажил албан ёсоор эхэллээ.
Энэхүү спорт цогцолбор нь хүүхэд, залуучууд болон иргэдийг биеийн тамир, спортоор тогтмол хичээллэх боломж, орчин нөхцөлөөр хангахын зэрэгцээ тамирчдын бэлтгэл сургуулилтыг дэмжих, спортын хөгжил, хамтын ажиллагааг шинэ шатанд гаргахад чухал ач холбогдолтой бүтээн байгуулалт болох юм. Мөн уг төсөл нь хоёр улсын ард түмний найрамдал, харилцан ойлголцол, урт хугацааны хамтын ажиллагааг биеийн тамир, спортын салбараар дамжуулан улам бататгахын зэрэгцээ ирээдүй хойч үед өвлөгдөн үлдэх бүтээн байгуулалт болж буйгаараа онцлогтой.
Байршлын хувьд “Дүнжингарав” худалдааны төвөөс зүүн, Үндэсний цэцэрлэгт хүрээлэнгийн хойд хэсгийн ногоон байгууламж бүхий соёл амралтын бүсэд байгуулна. “Президент” спорт цогцолборын үйл ажиллагааны нэгэн зэрэг нэвтрэх хүчин чадлын тооцоогоор 1327 хүнд үйлчилнэ. Харин өдөрт 4500-6000 орчим хүүхэд залуучууд спортоор хичээллэж, 8000-10000 хүнд тус цогцолбор үйлчлэх хүчин чадалтай аж. 58,560 м2 талбай бүхий сагсан бөмбөг, волейбол, хөлбөмбөг, усан сэлэлт, талбайн теннис, ширээний теннис, агаарын теннис, сквош теннис, бокс, бөх, ханан хадны авиралт, туялзуур сэлэм, буудлага, байт харваа, фитнесс, иог, спиннинг, дугуй зэрэг 19 төрлийн спортын үйл ажиллагааг явуулах юм байна.
