Баянхонгор аймгийн Сономын Лувсанвандангийн нэрэмжит Хөгжимт драмын театрын гоцлол дуучин, Соёлын тэргүүний ажилтан Р.Болортуяа Хөдөлмөрийн гавьяаны улаан тугийн одон хүртэхээр болжээ.
Р.Болортуяа Баянхонгор аймгийн Бөмбөгөр суманд төрж өссөн бөгөөд 2008 онд Соёл урлагийн их сургуулийг төгсөн, Бөмбөгөр сумандаа дуу хөгжмийн багшаар ажиллаж эхэлсэн байна. Улмаар аймгийн хэмжээнд зохион байгуулсан “Дуун фестиваль” уралдаанд түрүүлснээр Баянхонгор аймгийн Хөгжимт драмын театрт ажиллах урилга авчээ.
Өдгөө Сономын Лувсанвандангийн нэрэмжит Хөгжимт драмын театртаа 10 гаруй жил ажиллаж буй тэрбээр “Уянга, ухаарал”, “Учралын уянга”, “Болор ертөнц” зэрэг бие даасан тоглолтыг Улаанбаатар хотод толилуулж байв.

