Америкийн кино зураглаачдын холбооноос жил бүрийн хоёрдугаар сард зохион байгуулдаг “Америкийн шилдэг кино зураглаач”-ийг шалгаруулах ёслол буюу "29th ASC Annual Awards" наадмыг Монгол Улсыг төлөөлөн “News.mn” агентлаг анх удаа бүрэн эрхтэйгээр сурвалжлахаар боллоо.
Эл ёслолд дэлхийн алдартай кино зураглаачид, найруулагчид, жүжигчид, дуучид хүндэт зочид, шагналд нэр дэвшигчид болон ивээн тэтгэгч байгууллагуудын төлөөлөгчид оролцох юм байна. Ивээн тэтгэгч, кино үйлдвэрлэгч "Universal Studios", "Warner Bros", "Paramount Pictures", "Sony pictures" кино түгээгч байгууллагуудын төлөөлөгчид уг наадамд оролцох бөгөөд дэлхийн алдартай 1600 уран бүтээлчид оролцох тус наадамд “News.mn” сайтын урлагийн сэтгүүлч Э.Тэмлүүн Монгол Улсаа төлөөлөн хүндэт зочноор оролцохын зэрэгцээ наадмыг бүрэн эхээр нь сурвалжлах эрхтэйгээр хоёрдугаар сард АНУ-ын Лос Анжелас хотыг зорихоор боллоо.
Тэрээр Холливудын томоохон наадмуудын нэгт тооцогдох эл арга хэмжээний хүндэтгэлийн зоог, шилдэг зураглаач шалгаруулах наадмын шагнал гардуулах ёслол, After party зэрэг арга хэмжээнд оролцон сурвалжилж уншигчиддаа хүргэх юм.
Бид хамтарч ажиллах хүсэлтэй байгууллага хамт олонд нээлттэй юм. Сонирхуулахад, Монголын сэтгүүл зүйн салбар анх удаа Холливуудын томоохон наадмыг бүрэн эрхтэйгээр сурвалжлах, хүндэт зочноор уригдсан нь энэ.
