Монголын уран бүтээлчид дэлхийн өнцөг булан бүрт өөрийн орны нэрийг гаргасаар байна. Үүний нэг нь Поп акапелла урсгалаар уран бүтээлээ туурвидаг “s4” хамтлагийн залуус юм. Тэд өнгөрсөн 12 сарын 22-нд Бээжин хотын төв телевиз btv-ээс зохион байгуулдаг “You can” нэртэй олон улсын дуучдын тэмцээнд оролцож эхний шатандаа тэнцээд байгаа юм. “S4” хамтлагийн хувьд өнгөрсөн оны 12 сард “Хөх хот” болон “Бээжинд” алдартай “Эргүна” хамтлагийн тоглолтонд урилгаар оролцох гэж явахдаа тус тэмцээнд оролцох саналыг авчээ. Тоглолтын бэлтгэлйн хажуугаар тэмцээний бэлтгэл хийх хугацаа богинохон байсан ч “S4” хамтлагийн залуус маш амжилттай оролцож чадсан юм. Тэмцээний 10 шүүгчээс хамгийн өндөр оноог авч, хамгийн шилдэг номер болсон хэмээн үнэлэгдсэн байна.
Бээжин хотын төв телевиз btv-ээс зохион байгуулдаг “You can” нэртэй олон улсын дуучдын тэмцээн нь жил бүр зохион байгуулагдаж шилдэг хамтлаг дуучдийг шалгаруулдаг байгаа. Тус тэмцээнд энэ жил Америк, Орос, Аргентин,Япон, Солонгос зэрэг олон орны уран бүтээлчид оролцжээ. Тэмцээний эхний шатанд тэмцээний журмын дагуу өөрсдийн найруулгаараа хятад дуу дуулсанаас гадна өөрсдийн уран бүтээлээсээ дуулж сонирхуулжээ.
“You can” олон улсын дуучдын тэмцээний сүүлийн шалгаруулалт энэ сарын 24-нд Бээжин хотноо болох бөгөөд сүүлийн шатанд мөн адил Хятад дуу дуулах юм байна. Харин энэ сарын 26-нд орон орноос оролцсон дуучдын дундаас шилдгүүд тодрох юм. “S4” хамтлагийн хувьд өнгөрсөн онд уран бүтээлийн олз омог арвинтай байсан бөгөөд үзэгчидэд хэд хэдэн ковер уран бүтээл хүргээд амжсан. Мөн энэ онд ч хэд хэдэн ковер уран бүтээл хүргэхээр төлөвлөснөөс гадна энэ ондоо багтааж анхны цомогоо гаргахаар төлөвлөжээ. Түүнчлэн тэд хамгийн сүүлд “Нар минь байг”дуугаа сонсогчдын хүртээл болгоод байгаа бөгөөд тун удахгүй дууныхаа клипыг хүргэх юм байна
www.urlag.mn
