Хүнээр хүн хийх хэцүү гэж Монголчууд ярьцгаадаг. Тэгвэл “сайн” хүн бүтээх нь бүр ч амаргүй байх нь. Өнөөгийн нийгэмд хүүхдийг эд материалаар дутаахгүй л бол болж байна, хүүхдээ өсгөж байна гэх бодол бидний дунд нийтлэг болжээ. Хүүхдээ бие махбодийн хувьд өсгөж болж байна, Харин оюун, сэтгэлийн тухайд бид хэр өсгөж чадаж байна вэ?
Шинэ Монголын ууган сургууль, Нийслэлийн лабратори 1-р бага сургуулийн н.Батжаргал багштай 2Д ангийн 49 сурагч, бага сургуулийн захиргаа, эцэг эхчүүд, мөн МУИС-ийн сэтгүүлзүйн оюутан А.Оюунзул нар хамтран 1883 онд Италийн зохиолч Карло Коллодигийн бичсэн, дэлхийн хүүхдийн шилдэг бүтээл болох Пинокио жүжгээр энэ асуултад хариулт өгөхийг оролдож тайзны бүтээл болгожээ.
Энэ төслийн хүрээнд сурагч, багачууд Пинокио зохиолыг уншиж, эх зохиож, дүрд хувирах, дүрийн талаар ярилцах, санал шүүмж гаргах зэргээр хүүхдийн сэтгэн бодох, шүүн тунгаах, эргэцүүлэх бодох чадварт нөлөөлөх дасгалуудыг хийж хэл яриа, хөдөлгөөнөөр өөрийгөө илэрхийлэхэд суралцсан байна.
Уолт Диснейн хүүхэлдэйн киногоор нь сайн мэдэх энэхүү зохиол сайн хүүхэд гэж хэн болох, цаашлаад сайн хүн ямар зүйлс хийх ёстойг харуулсан бүтээл юм. Эцэг эхийн төлөөлөл "Пинокио" жүжгийн зохиолыг хялбаршуулан орчуулж, хүүхдүүд нь нийт долоон үзэгдэлтэйгээр найруулан тогложээ.
Мөн жүжгийн үзэгдэл хооронд хүүхдүүд өөрсдөө дуулж бүжиглэн, тайзны арын засал чимэглэлийг өөрсдөө хариуцан амилуулжээ. Ангийн хүүхэд бүр, эцэг эхчүүд хамтдаа сүүлийн сар гаран хугацаанд бэлтгэж тайзны бүтээл болгон толилуулжээ.
Бяцхан сурагчид Пинокио хүүхдийн жүжгийг өнгөрөгч Баасан гарагт буюу 2015 оны 5 сарын 8-ны өдөр Нийслэлийн 1 сургуулийн байранд хоёрдугаар ангийнхаа нийт сурагчдад тоглож сонирхуулжээ.
Хүүхэд бүрийг нийгмийн “сайн” иргэн болгон төлөвшүүлэхэд” Эцэг, эх – Хүүхэд – Сургууль”-ийн хамтын ажиллагаа хамгийн чухал үүрэгтэй бөгөөд эцэг эхчүүдийн санаачлан хэрэгжүүлсэн уг үйл ажиллагааг сургуулийн захиргаа дэмжин ажиллажээ.
www.urlag.mn
