Өнгөрсөн долоо хоногийн байдлаар өргөн хэрэглээний хүнсний бүтээгдэхүүний үнэ өмнөх сарын дундаж үнэтэй харьцуулахад 0.7 хувиар өссөн бол, өмнөх долоо хоногийнхтой харьцуулахад 1.4 хувиар буурсан гэсэн судалгааг Үндэсний статистикийн хорооноос гаргасан. Тэгвэл өчигдрийн байдлаар "Хүчит шонхор" захад үхрийн цул мах кг нь 7500, ястай нь 7000 төгрөг, адууны цул мах 6000, ястай нь 5000 төгрөг, хонины цул мах 5500, ястай нь 5000 төгрөг, ямааны цул мах 5000-5500 төгрөг, тэмээний цул мах 5000 төгрөгийн үнэтэй байлаа. Махны үнэ ийн огцом буурсан шалтгааныг махны ченжүүд ярихдаа "Наадмын өдрүүдэд махны үнэ л нэмэгдэх хандлагатай байсан. Ер нь мах нийлүүлэлтээсээ шалтгаалж долоо хоног бүр харьцангуй өөр байдаг. Одоо намар оюутнууд орж ирэхээр мах элбэг болдог. Үнийн хувьд ч буурна" хэмээн тайлбарладаг. Мөн орос гурил кг нь 800-950 төгрөг, "Алтан тариа" ХК-ийн дээд гурил кг нь 800-850, нэгдүгээр гурил 750-900, хоёрдугаар гурил 650-750 төгрөг бол "Улаанбаатар" ХХК болон "Атар гурилын үнэ мөн адил үнэтэйгээр хэлбэлзэж байгаа бол цагаан будаа кг нь 1700-1800, элсэн чихэр 1800-2200 төгрөг, монгол үрийн төмс кг нь 700-900, голланд үрийн төмс кг 1000-1200, байцаа 1000-1200, лууван 650-850, сонгино 900-1200 төгрөгөөр худалдаалагдаж байна. Үндэсний статискийн хорооноос гаргасан судалгаагаар бол өнгөрсөн долоо хоногийн байдлаар өмнөх сарын дундаж үнэтэй харьцуулахад үхрийн махны үнэ 4.8-6.0 хувь, адууны махны үнэ 7.1 хувь, ямааны махны үнэ 4.1 хувиар буурсан бол, хонины махны үнэ 0.4 хувиар өсчээ. Махны үнийг өмнөх долоо хоногийн үнэтэй харьцуулахад үхрийн махны үнэ 5.2-6.1 хувь, хонины махны үнэ 6.3 хувь, адууны махны үнэ 7.5 хувь, ямааны махны үнэ 5.9 хувиар буурсан байна. Тэгвэл гурилын үнэ өмнөх сарын дундаж үнэтэй харьцуулахад "Алтан тариа" ХК-ийн задгай нэг, хоёрдугаар гурил 3.1 хувь, савласан дээд гурил 1.7 хувиар өссөн байна. Өмнөх долоо хоногийн дундаж үнэтэй харьцуулахад "Алтан тариа" ХК-ийн задгай нэгдүгээр гурил 0.7 хувиар өссөн бол, савласан дээд гурилын үнэ хэвээрээ байгаа аж. Будаа, элсэн чихрийн үнэ сүүлийн нэг сарын хугацаанд тогтвортой байгаа юм байна. Цагаан будааны үнийг өмнөх сарын дундаж үнэтэй харьцуулахад 0.2 хувиар буурсан бол, өмнөх долоо хоногийнхтой харьцуулахад тогтвортой байгаа юм. Төмс, хүнсний ногооны үнийг өмнөх сарын дундаж үнэтэй харьцуулахад луувангийн үнэ 64.2 хувь, байцааны үнэ 14.7 хувь, төмсний үнэ 1.4 хувь, сонгинын үнэ 0.3 хувиар буурчээ. Өмнөх долоо хоногийн дундаж үнэтэй харьцуулахад луувангийн үнэ 46.4 хувь, сонгинын үнэ 1.0 хувиар өсчээ. Харин байцаа төмсний үнэ тогтвортой байна гэсэн үзүүлэлттэй байгаа аж.
