Америкийн нэрт дуучин Женнифер Лопес өөрийн экс жолоочийг гэмт үйлдэлд буруутган шүүхэд нэхэмжлэх гаргажээ. Дуучин бүсгүй түүнээс нөхөн төлбөр болгож 20 гаруй сая доллар нэхэмжилж байгаа аж. Лопесын хувийн жолоочоор ажиллаж байсан Хакоб Манукян гэгч эр эрх мэдэлдээ дэндүү ташуурсан гэж дуучин бүсгүй мэдэгдэв.
Тэрбээр Лопесын аюулгүй байдлын албыг өөрийн бүрэн хяналтад авахыг оролдсоноос гадна цалингаа нэмэхийг шаардаж байжээ. Шаардлагыг нь хүлээж аваагүй тул жолооч эр Лопесыг дарамталж эхэлсэн аж.
Мань эр бүсгүйн хувийн нууцуудыг дэлгэнэ хэмээн айлгаж 2.8 сая доллар өгөхийг “гуйсан” юм. Манукян өөрийг нь ямар нэгэн учир шалтгаангүйгээр ажлаас халсанд буруутган Лопесыг шүүхэд өгсөн байжээ.
