Хэдэн жилийн өмнө алс холын Америк орныг зорьсон МУСТА, хөгжмийн зохиолч, дуучин, продюсер Б.Чинбатыг Монголчууд битүүхэн үгүйлж байсан. Зарим хүмүүс “Монгол Улс нэгэн чадварлаг хөгжимчнөө харийн оронд алдчихлаа” хэмээн харамсч суусан ч “залуу хүн мэдлэг боловсролоо дээшлүүлээд, бүр илүү ихийг сураад эх орондоо эргээд ирэх байлгүй дээ” гэх горьдлого тээх ч олон байлаа.
Б.Чинбат Америк оронд уран бүтээлээ туурвихын хажуугаар “Sweetymotion” хамтлагийн продюсерээр ажиллаж Монголынхоо урлагийг харийнханд таниулсан чадварлаг залуу. Түүний бүтээлүүд хилийн чанадад ёстой л хүчээ авсан. Харин саяхан тэрбээр Монгол төрийн үндэсний их найрал хөгжим үүсэн байгуулагдсаны 50 жилийн ойд зориулсан “Рок попын их хуралдай” тоглолтод оролцсон юм.
Түүнийг тайзнаа алдарт “Мандухай сэцэн хатан”-аа эгшиглүүлэхэд үзэгчдийн цөс аргагүй л хөөрсөн. Тус тоглолтын үеэр түүнтэй уулзаж хэдэн хором ярилцлаа.
-Сайн байна уу. Танд энэ өдрийн мэнд хүргэе. Үндэсний их найрал хөгжимтэй хамтран хөгжимдлөө. Тоглолт сайхан уур амьсгалтай болж байна. Сэтгэгдэл ямар байна?
-Монгол төрийнхөө үндэсний их найрал хөгжимтэй төгөлдөр хуураа хослуулан тоглолоо. Үнэхээр сайхан, сүрлэг байна. Энэ том найралтай нэг тайзан дээр тоглоно гэдэг бол хэн хүнд олдохгүй том аз гэж бодож байгаа.
-Та бол энэ тоглолтын хүндэт зочин. Тоглолтын урилгыг хүлээж авахад ямар сэтгэгдэл төрсөн бэ?
-Энэхүү тоглолтод хүндэт зочноор уригдсан явдал бол нэр төрийн хэрэг. Анх надад урилга өгөхөд маш их баярласан. Миний аав, ээж хоёр ҮДБЭЧ-ын их найрал хөгжимтэй амьдралаараа холбогдсон хүмүүс байдаг. Миний бага нас ч бас энд өнгөрсөн.
-Урлагийн хүн болох гараа эндээс эхэлсэн гэж хэлж болох нь ээ?
-Тэгэлгүй яахав. Би жаахан хүүхэд байхаасаа л аав, ээжийгээ дагадаг, эндээс хөгжмийн, тэр дундаа төгөлдөр хуурын гайхамшгийг мэдэрсэн. Ингэж миний урлагийн хүн болох зам эхэлсэн юм.
-Таны хувьд АНУ-д багагүй хугацааг өнгөрүүллээ. Эх орноо санасан байх?
-Би 20 хоногийн өмнө эх орондоо ирлээ. Намайг ирэх бүрт Монгол нутаг ус минь их сайхан уур амьсгалтай угтдаг юм. Энэ удаа ч бас тэгж байна. ҮДБЭЧ-ын Үндэсний их найрал хөгжим байгуулагдсаны 50 жилийн ой тохиож байгаа баярт мөчийг Монголчуудтайгаа хуваалцаж байна. Хөгжим гэдэг бол хүнийг хүмүүжүүлж, сайн талаас нь нээж байдаг зүйл. Энэ ч утгаараа миний амьдрал хөгжимтэй салшгүй холбоотой.
-Таныг анх Америк орныг зориход эх орондоо эргэж ирэхгүй дээ гэх хүмүүс олон байсан?
-Америкт ажиллаж амьдраад, уран бүтээлээ хийхийн хажуугаар маш их зүйл сурлаа. Харин тэрхүү суралцсан зүйлээ эх орондоо хийх ёстой юм байна гэдгийг сайн ойлгосон. Энэ удаад Америк дахь бүх ажлаа зохицуулаад эх орондоо ирсэн.
-Сүүлийн үед хийж байгаа уран бүтээлүүдээсээ дурдвал?
-Саяхан “One music“ продакшнаа байгуулсан. Манай продакшн Монголынхоо ардын хөгжимчид, дуучид, уран бүтээлчидтэй хамтарч ажиллах болно. Тухайлбал, морин хуурч Г.Жамъяан гуайн хэмжээнд дүйцэх тоглолт үзүүлдэг морин хуурч Д.Шинэцогтын уран бүтээл дээр ажиллаж байна. Энэ залуу бол гайхамшигтай авьяастай. Монгол түмэн залуусаар бахархах ёстой. Тийм болохоор залуу үеэ илүү дэмжиж ажиллах бодолтой байна. Мөн манай продакшн хөвгүүдийн хамтлаг, шинэ залуу гоцлол дуучдыг ч дэмжиж ажиллаж байгаа. Залуу үеийнхний цаг нь болохоор хүмүүст маш сайн уран бүтээлүүд хүрч эхэлнэ.
-Баярлалаа. Танд уран бүтээлийн өндөр амжилт хүсье.
О.Чанцалдулам
