Хүнд хөгжмийн төрөлд багтах метал урсгалыг сонсогчид манай хөгжим сонирхогчдын дунд цөөнгүй. Тэдэнд зориулсан тоглолтыг энэ сарын 18-нд зохион байгуулахаар болжээ. Метал хөгжмийн баярт “Булсара”, “Метроном”, “Профест”, “Зүгээр л”, “Хос сүх” зэрэг хамтлаг “Нисванис”-ийнхантай нэгдэхээр болсон аж. Мөн энэ өдөр ОХУ-ын “Шторм” хамтлаг “Нисванис”-ийн дуунаас тоглож сонирхуулах юм байна.
Манай улсад метал байтугай хард рок хөгжмийг хориглож байсан үе бий. Гэхдээ 1984 онд “Аясын салхи” хамтлаг байгуулагдаж хүнд метал хөгжмөөр тоглож эхэлсэн түүхтэй. Тухайн үед тэдний уран бүтээлийг хориглосноос хамтлагийнхан хэсэг нам жим болжээ. Харин 1990-ээд оноос “Харанга”, “Хурд” байгуулагдсанаар амьд хөгжим хөгжсөн байна.
