Адал явдалт инээдмийн хүүхэлдэйн киноны сүүлийн анги, “Madagascar 3”кино нээлтээ хийсэн эхний долоо хоногтоо зургаан сая фунт стерлингийн ашиг орлого олсноор Британийн Box Office-ийн жагсаалтыг шууд тэргүүлсэн байна. Комьютер графикаар бүтээгдсэн 3D хэмжээст уг кино хамгийн өндөр ашиг орлоготой киногоор шалгарч байсан аймшгийн киноны үргэлжлэл, 2,5 сая фунт стерлингийн орлого олоод байгаа “Paranormal Activity 4”киног ардаа орхиж чадсан юм.
Өнгөрсөн долоо хоногийн чартыг тэргүүлсэн “Taken 2” кино 2,3 сая фунт стерлингийн орлогоороо гуравдугаар байр луу ухарсан бол “Hotel Transylvania” нь 1 сая долларын ашиг олсноор дөрөвдүгээр байранд оржээ. Шилдэг 15 киноны жагсаалтанд багтсан 15 киноны нийт орлого 15,2 сая фунт стерлинг болсон нь өнгөрсөн долоо хоногийн ашгаас 56 хувиар нэмэгдсэн байна. Жагсаалтын шилдэг тавд, жүжигчин Брьюс Виллис, Эмили Блант нарын тоглосон шинжлэх ухааны уран зөгнөлт “Looper” кино багтсан юм. Түүнчлэн шилдэг 15 кинонд шинээр дэлгэцнээ гарсан дөрвөн ч кино байсан юм.
Б.Болормаа
