Дуучин Бруно Марс өчигдөр Америкийн алдартай телевизийн ток шоунуудын нэг NBC-ийн “The Ellen DeGeneres Show”-д оролцох үеэрээ энэ зун “The Moonshine Jungle” нэртэй аялан тоглолтоо эхлүүлэхээр төлөвлөсөн тухайгаа ярьжээ. Тэрээр аялан тоглолтоо Хойд Америкаас эхлүүлж, Лос-Анжелос, Нью-Йорк, Чикаго Майами хотуудаар үргэлжлүүлэх юм байна. Түүний аялан тоглолтод Британийн дуучин, хөгжмийн зохиолч Элли Голдинг болон поп чиглэлээр уран бүтээлээ туурвидаг “Fitz” хамтлаг оролцох гэнэ.
Бруно аялан тоглолтоо яг хэдэн сарын хэдний өдөр эхлэх тухай нарийн товыг удахгүй мэдэгдэнэ гэдгээ ярилцлагынхаа үеэр онцолсон аж. Өдгөө 27 настай дуучин тоглолтынхоо талаар өнгөрсөн долоо хоногт мөн өөрийн Twitter-ээр фэнүүддээ дуулгаж, хамгийн сүүлд “When I Was Your Man" нэртэй шинэ сингл гаргасан тухайгаа мэдэгдсэн байна.
