Бид энэ удаад “Yellow hot” буландаа дуучин К.Номинжинг онцолж байна. Тэрбээр 10 гаруй хэлээр чөлөөтэй ярьж, дуулдаг хөдөлмөрч бүсгүй билээ.
Түүнийг Монголын роп попын залгамж халаа гэж үзэх хүмүүс ч цөөнгүй. Дуучин К.Номинжинг цагаан хоолтон гэдэг нь тодотгодог билээ. Тэрбээр 7 настайдаа дээрхийн гэгээн Далай ламаас бодийн сахил хүртсэн тэр үеэсээ бясалгаж эхэлсэн байна. Бага наснаасаа бясалгаж эхэлсэн учир өөрийн сахилд нийцүүлж амьтны амь хөнөөлгүйгээр бэлтгэсэн хоол хүнс хэрэглэдэг аж.
Түүний номын багш нь төгс гэгээрсэн их багш Чин Хай бөгөөд багшийнхаа сургаалийг алхам тутамдаа дагаж, бясалгаж явдаг гэдгээ дуучин бүсгүй маань онцолжээ. Өдөрт 2-3 цаг унтаад шөнөжин бясалгахад бүтэн өдөржин эрч хүчтэй байж, бүхий л ажил төрлөө амжуулж чаддаг. Бясалгал хүнд тийм их эрч хүч өгдөг хэмээн ярьсан байна.
Дуучин маань дууны бичлэг, зураг авалтад орохдоо заавал бясалгадаг бөгөөд ингэснээр өөртөө эрч хүч авдаг гэнэ. Сонирхуулахад, түүнд К.Номин гэдэг нэрийг өгсөн ч бага байхаасаа л өөрийгөө Номинжин хэмээн хүмүүст танилцуулдаг байж. Түүнээс хойш гэрийнхэн ч Номинжин гэх болжээ. Энэ талаар нэгэн ярилцлагадаа дурьдахдаа би нэрээ өөрөө өөртөө өгсөн хэмээн хэлсэн байна.
Ингээд хөдөлмөрч, эрч хүчтэй түүнд уран бүтээлийн амжилт хүсье.
Б.Хорлоо
