Монголын урлагийн дунд үеийн төлөөлөл болсон “Шилдэг өнгө” продакшны жүжигчин МУСТА Г.Золбоот 1989 онд УБДС-ийн кино драмын ангид элссэнээр түүний урлагийн хүн болох тэр дундаа жүжигчин болох гараа нь эхэлсэн гэж болно.
Түүний ажил хөдөлмөрийн гараа “Армийн театр”-аас эхэлсэн гэдэг. Тэрбээр “Аянгын бороо” хэмээх Хятадын алдарт жүжгийн Жоу Чуны дүрийг бүтээж 2000 онд шилдэг эрэгтэй жүжигчний шагнал хүртэж байсан юм.
Түүнээс өнөөг хүртэл алтан тайзаа, дэлгэцийн урлагаа орхиогүй билээ. Түүний анхны бүтээл “Бүлээн нурам” кино байсан бөгөөд урлагийн тогоонд 20 гаруй жил чанагдахдаа 40 гаруй дүр бүтээжээ. Гэхдээ энэ тоо зөвхөн дэлгэцийн бүтээлийнх нь. Харин жүжиг, хошин урлагийн шоу хөтөлбөрийн дүрүүдийг нь оролцуулбал 130 –аад дүрийг бүтээж, амилуулсан байх юм.
Түүний тоглосон уран бүтээлээс дурьдвал, “Долоон бурхан харвадаггүй”, “Аравт”, “Үхэж үл болно Чингис хаан”, “999”, “Мойлхон”, “Сүүлчийн бүжиг”, “Цахирмаа” зэрэг кинонд гол болон туслах дүр бүтээж “Овжин охид”, “Зугтаарай” кинонд туслах найруулагчаар ажилласан байдаг.
Ихэвчлэн эерэг дүрд тоглодог түүнийг үзэгчид “Эерэг дүр”-ийн Г.Золбоот хэмээн нэрийдсэн билээ.
Б.Хорлоо
