Монголын сонгомол уран бүтээлүүд “Ханбүргэдэй” Арт галерейд

 Уран зураг бол үггүй яруу найраг гэдэг.  Тийм ч болохоор энэ гайхамшигтай ертөнцөөс хүмүүс сэтгэлийн таашаал, гоо зүйн төлөвшил олж авдаг. Бүтээлүүд нь дэлхийн уран зураг цуглуулагчдын нүдийг булааж, сэтгэлийг баясган, үнэ хаялцан авдаг зураачид Монголоос төрж гарсан нь цөөн биш ажээ. Тэгвэл Монголын дүрслэн урлагийн түвшинг дэлхийн урлагийн дайдад гайхуулан гаргаж ирсэн эрхэм алдартнууд, үггүй яруу найрагчдын шилмэл бүтээлийн үзэсгэлэн “Ханбүргэдэй” Арт галерейд нээгдлээ.

Монгол Улсын Төрийн соёрхолт, зураач До.Болд, Ш.Чимэддорж, Ц.Энхжин, С.Саранцацралт, Урлагийн гавьяат зүтгэлтэн Дунбүрээ, Соёлын гавьяат зүтгэлтэн Ц.Нарангэрэл нарын дүрслэх урлагийн оргил зураачдын шилмэл бүтээлээр уг галерей анхныхаа үзэсгэлэнг нээж байгаа ажээ. Эдгээр шилдэг зураачдын бүтээл нэг дор тавигдсан үзэсгэлэн өмнө нь олны хүртээл болж байгаагүй тул “Ханбүргэдэй” Арт галерейд дэлгэгдэж буй үзэсгэлэн олны сонирхлыг эргүй татах биз ээ.

Үзэсгэлэнд зураачдын оюун ухаан, уран сэтгэмж, сэтгэлийн далд ертөнц, ур чадвараар бүтсэн сор бүтээлүүд тавигджээ.  Байгаль эх, дэлхий хийгээд хүмүүний амьдралын мөн чанар, орон зай, цаг хугацаа гээд өөр өөр өнгө будаг, хэлбэр орон зайн зохицолдлогоог үзэсгэлэнд тавигдсан бүтээлүүдээс харж болно.

Төр соёрхсон уран зураачдын түмэнд дээжилсэн урын санг та бүхэн таалан сонирхоорой. Монголын сонгомол уран бүтээлүүд “Ханбүргэдэй” Арт галерейд тухлан саатаад байна.