Дуучин Шакира спортын Self сэтгүүлд зориулан зургаа авахуулжээ. Тэрээр энэ оны нэгдүгээр сард Милан нэртэй хүү төрүүлснээсээ хойш биеийн галбираа хэрхэн хэвэнд нь оруулсан болохоо харуулсан байна. Гэхдээ дуучин бүсгүй тийм амархан урьдын хэвэндээ ороогүй гэдгээ хүлээн зөвшөөрчээ. “Төрсний дараа хийлсэн бөмбөг шиг харагддаг юм шүү” гэж тэрээр ил шулуун мэдэгдэв.
Шакира жирэмсний үедээ илүүдэл жинтэй болохгүйн тулд долоон хоногт 4-5 удаа өглөөний дасгал хийж байсан гэж ярьжээ. Тэрээр бүжгийн дасгал сургуулилт болох зумбаг хийж байсан гэнэ. Спортын энэ төрлийг бий болгогч дасгалжуулагч Бето Перестэй хичээллэж байсан аж. Үүний үр дүнд бүсгүй хоёр сарын дотор бие галбираа хэвэнд нь оруулсан бөгөөд “Дуу хоолой” шоуны шүүгчээр ажиллаж эхэлсэн юм. Уйгагүй хичээллэхийн зэрэгцээ зөв хоолловол амжилтад хүрнэ гэж Шакира ярьсан байна.
