"Монголчууд” хэмээх дорно дахины нэвтэрхий толийг босоо монгол болоод кирилл бичгийн гэсэн хос хувилбараар буулган дэлхий даяар түгээж эхэлсэн. Тодруулбал, “Цогт цагийн хүрдэн” соёлын төвийн кирилл бичигт хөрвүүлж буй “Ганжуур, Данжуур”-ыг АНУ-ын Конгрессын номын сан залсан, өөр улс орнууд ч энэ тухай хүсэлт ирүүлсэн аж.
Дээрх төвөөс Конгрессын номын сантай өнгөрсөн оноос холбоо тогтоож гэрээ байгуулан ажиллажээ. Саяхан АНУ-ын Конгрессын номын сангийн Төвд-Монгол номын цуглуулга хариуцсан мэргэжилтэн Сюзан Мейнхейт Олон улсын Төвд судлалын XIII их хуралд оролцохоор ирж, энэ үеэр дээрх соёлын төвийн үйл ажиллагаатай танилцаад “Ганжуур, Данжуур”-ын хэвлэсэн ботиудыг залаад буцжээ.
Мөн Германы Бонны их сургуулийн номын сан тус сударыг залахаа илэрхийлсэн бол Английн Оксфордын их сургууль ч “Ганжуур, Данжуур”-ыг сургуулийнхаа номын санд зална гэдгээ илэрхийлжээ. Цаашлаад Хятадын ӨМӨЗО-ны Багшийн их сургуулийн төлөөлөгч ирж уулзаад номын сандаа зална гэдгээ албан ёсоор илэрхийлсэн байна.
www.URLAG.mn
