УДЭТ-ын Ерөнхий найруулагч Н.Наранбаатар тун удахгүй тайзнаа Английн алдарт зохиолч Рэй Кунигын “Эцсийн зогсоол зөвхөн чи” жүжгийг амилуулахаар болжээ. Тус жүжгийн клип бэлэн болсон бөгөөд жүжгийн клипийн дууг хэн нэгэн дуулсангүй. Харин жүжигчид нь бүжигээр бүхнийг илэрхийлсэн нь онцлог юм.
. Уг жүжгийн бүжиг дэглээчээр Соёлын тэргүүний ажилтан, бүжиг дэглээч Г.Ган-Очир ажилласан байна. Жүжгийн жанартаа тохируулан клипээ хөнгөн инээдмийн өнгө аястайгаар план таслахгүйгээр буюу монтажгүй авчээ. Тиймээс бүжгийн болон хөдөлгөөний тавилтуудыг өвөрмөц байлгахаар орчин үеийн сонирхогчдын бүжиг гэхээсээ илүү хуучны алдарт мэргэжлийн бүжиг болох “Swing dance”-ын хэмнэлүүдийг оруулж өгчээ.
Найруулагч Н.Наранбаатарын найруулан тавьж байгаа “Эцсийн зогсоол зөвхөн чи” жүжгийн нээлт энэ сарын 20-нд 20.30 цагт УДЭТ-т болно. Жүжгийн гол дүрд Гавьяат жүжигчин Ж.Оюундарь, Соёлын тэргүүний ажилтан Л.Дэмидбаатар нар тогложээ. Мөн Ардын жүжигчин С.Сарантуяа, Соёлын тэргүүний ажилтан жүжигчин Д.Баттөмөр, Соёлын тэргүүний ажилтан жүжигчин Ц.Төмөрхуяг болон залуу уран бүтээлчид оролцон тогложээ.
www.URLAG.mn
