Өсвөр насны хүүхдэд зориулсан “Зүүд шиг өдрүүд” уран сайхны киноны ерөнхий продюсерээр “ETV” телевизийн захирал Батчулууны Мөнгөнтуяа, Ерөнхий найруулагчаар МУСТА Егүзэрийн Баярмагнай, ерөнхий зураглаачаар Болормаагийн Галбаатар нар ажиллалаа. Уг киноны зохиолыг МУСГ Дамбийн Дашдондов бичсэн юм.
Нүүдлийн соёл иргэншил хотын хөгжилд дарагдаж буй энэ цаг үед өв уламжлалаа сэргээх, монгол зан заншлыг хадгалан үлдэх нь чухал. Иймд эрдэнэтийн уран бүтээлчид нэгдэж анх удаа кино бүтээсэн нь энэ юм. Тус киноны нээлт өнөөдөр УСО-ны их танхимд боллоо. Нээлтийн ажиллагаанд киноны уран бүтээлчдээс гадна ерөнхий ивээн тэтгэгчээр ажилласан “Эрдэнэт үйлдвэр”, “Эрдмин” ХХК-ийн удирдлага болон хэвлэл мэдээлэл, хүүхэд, залуусын төлөөлөл оролцлоо. “Зүүд шиг өдрүүд” киноны гол дүр Болдоо, Алдар, Борхүү нарт Э.Батжаргал, Г.Мөнхбаяр, Т.Түмэнбаяр нар тогложээ. Хотод амьдардаг Болдоо, Алдар нар зуныхаа амралтаар хөдөө өвөөгийндөө очиж амарна. Энэ үеэр Борхүүтэй танилцаж улмаар хотын хүүхдүүд хөдөө хэрхэн дасан зохицож байгааг тэдний адал явдал харуулна. Баяр, хөөр, уйтгар гуниг, дэггүйтэл гээд тэдний адал явдал 14 ангийн турш үргэлжилнэ. Хүүхдийг хүүхдээр дамжуулж хүмүүжүүлэх хамгийн энгийн арга бол яах аргагүй кино урлаг юм. Иймд хүүхдийн гэгээлэг ертөнцийг танин мэдэхүйтэй хосолж буй “Зүүд шиг өдрүүд” уран сайхны киноны үр нөлөө, үр дүн их юм. Энэ киноны гол дүрийн сурагчид анх удаа кинонд тоглож байгаагаараа онцлог. Мөн кино зохиолыг бичсэн зохиолч, найруулагч, зураглаач, продюсер, туслах дүрийн жүжигчид бүгд эрдэнэтийн уран бүтээлчид. Тэд урлагийн талбарт өөр, өөрийн гэсэн уран бүтээлтэй хүмүүс юм.
Монголын кино урлаг хөгжиж буй энэ үед хүүхдэд зориулсан танин мэдэхүйн кино, нэвтрүүлэг хомс байгаа нь өнөөгийн нийгмийн гол дутагдал. Ялангуяа “хотожсон” хөдөөд энэ нь бүр илүү байгааг эрдэнэтийн уран бүтээлчид олж харан киногоороо дамжуулан тэднийг хүмүүжүүлэх, танин мэдүүлэх, ойлгуулах, сургахыг зорьжээ. Түүнчлэн киноны зураг авалтын 90 хувийг хөдөө авсан байна. “Зүүд шиг өдрүүд” уран сайхны кино энэ сарын 20-оос “ETV” телевизээр олны хүртээл болно
www.URLAG.mn
