16 дахь удаагийн “Улаанбаатар” олон улсын кино наадам энэ сарын 16-22-нд Улаанбаатар хотноо болно. Тус наадам нь Монголын кино урлагийн салбарыг хөгжүүлэх, дэлхийн нэр хүндтэй наадмуудад шалгарсан кино бүтээлийг Монголын үзэгчдэд хүргэх, кино уран бүтээлчдийн олон улсын хамтын ажиллагааг нэмэгдүүлэх зорилготой.
Өнөө жилийн наадам нээлтийн ёслол, нээлтийн үзвэр, Монгол кино үзвэр, олон улсын баримтат ба уран сайхны үзвэр, “Үзэхийн Хязгаар” монгол сонгодог бүтээл, “Залуу үзэгч” хөтөлбөр болон кино уран бүтээлчдэд зориулсан мастер хичээлүүдээс бүрдэнэ. Наадмын хүрээнд Герман, Франц, Австрали, АНУ, Итали, Непаль, Хятад, Энэтхэг, Швед, Палестин, Норвеги, Ирланд зэрэг улсуудын 2023-2024 онд бүтээгдсэн 14 шилдэг олон улсын уран сайхны болон баримтат киног үзэгчдэд толилуулахаар хөтөлбөрөө бэлтгэжээ. Эдгээр уран бүтээлийг “Тэнгис”, “Өргөө-3” болон “Синема нэкст” кинотеатруудаар үзэгчдийн хүртээл болгоно.
Наадмын “Үзэхийн Хязгаар” хэсгээр Монголын сор, сонгодог хуучны уран бүтээлч, найруулагчийн бүтээлийг орчин үеийн үзэгч, залуучуудад дахин өргөн дэлгэцээр толилуулж, нэрт уран бүтээлчдийг алдаршуулах, тэдэнд хүндэтгэл үзүүлдэг. Энэ жил Монгол Улсын Төрийн шагналт, Урлагийн гавьяат зүтгэлтэн, нэрт кино найруулагч Б.Балжиннямын 1986 онд бүтээсэн “Сүүдэр”, 1984 онд бүтээсэн “Тан руу нүүж явна” уран сайхны киног онцлон, энэ сарын 19-нд “Тэнгис” кинотеатрт тус тус ганцхан удаа өргөн дэлгэцээр толилуулахаар болжээ.
