Нийгэм-сэтгэлзүйн драмыг үндэслэгч Хенрик Ибсений “Хүүхэлдэйн байшин” жүжиг “Bee” театрын тайзнаа олны хүртээл болж байна.
Норвегийн жүжгийн зохиолч Х.Ибсен нь дэлхийн шилдэг жүжгийн зохиолын уламжлалыг үргэлжлүүлэн шинэ шатнаа хөгжүүлсэн хүн юм. Түүний жүжгийн зохиолууд нь шүүмжлэлт бодол санаа, дээд зэргийн хүнлэг чанар, хүний эрх чөлөөний тэмцлийн уриа болж ирсэн түүхтэй.
Х.Ибсений жүжгийн зохиолуудын оргил бүтээл нь “Хүүхэлдэйн байшин” гэгддэг. Эл зохиолын гол баатар Нора бүсгүйн нөхөр Хельмер хүнд өвчин тусаж, гадаадад очиж эмчлүүлэх шаардлагатай болсон тул тэрбээр нас барсан эцгийнхээ гарын үсгийг хуурамчаар дуурайлган зурж, гэрээ хийснээр итгэмжлэгдсэн төлөөлөгч Крогстагаас эмчилгээний зардал болох их хэмжээний мөнгийг нууцаар зээлнэ. Энэ үйлдлээ тэрбээр насан туршдаа нууцлахаар шийдсэн ч тэр “нууц” нууц биш болох цаг улам бүр ойртсоор л байна.
“Хүүхэлдэйн байшин” жүжгийн продюсероор Д.Мэндсайхан, найруулагчаар Т.Хүслэн ажиллажээ. Тус жүжгийг ирэх арваннэгдүгээр сарын 3-ныг хүртэл толилуулна. Тасалбарыг ticket.mn-ээс авах боломжтой.
