Холливудын жүжигчин Антонио Бандерасын гол дүрд нь тоглож буй “Mare Nostrum” уран сайхны киноны Латин Америк дахь түгээлтийн эрхийг “Buena Vista International” компани худалдан авчээ.
“Mare Nostrum” киног Аргентины найруулагч Мариано Кон, Гастон Дюпра нар хамтран найруулж байгаа бөгөөд Антонио Бандерас хөлөг онгоцны ахмад Альваро Сальседогийн дүрийг бүтээх юм.
Киноны үйл явдал Истанбулаас Кейптаун хотыг чиглэн нэг тэрбум еврогийн үнэ бүхий ачаа тээвэрлэж яваа асар том чингэлэгт хөлөг онгоцны эргэн тойронд өрнөнө. Далайн хүчтэй шуурганы үеэр ахмад Африкийн цагаачдаар дүүрсэн, живэх аюулд орсон жижиг завьтай таарна.
Тэрбээр тэднийг аврах эсвэл хувь заяанд нь орхих гэсэн хүндхэн сонголттой нүүр тулж, эцэст нь хөлөг онгоцондоо авч суулгадаг. Гэвч энэ шийдвэр нь олон улсын улс төрийн томоохон хямралын эхлэл болно. Учир нь Европын аль ч улс аврагдсан хүмүүсийг эрэг дээрээ буулгахыг зөвшөөрөхгүй.
Найруулагчдын хэлснээр уг кино цагаачлал, хил хязгаар болон хүний мөн чанарын зөрчилтэй талуудыг хөндөх ажээ. Тэд “Mare Nostrum”-ыг өнөөг хүртэл бүтээсэн хамгийн том, амбицтай төсөл хэмээн тодорхойлж, хурцадмал байдал, драм болон егөөдсөн хошигнолыг хослуулахыг зорьж байгаа юм.
Киноны зураг авалт 2027 оны гуравдугаар сард Испанид эхлэхээр төлөвлөгджээ. Харин олон улсын борлуулалтыг Их Британийн “HanWay Films” компани хариуцаж байна.
