Улсын хүүхэлдэйн театрын уран бүтээлчид энэ сарын 26, 27-нд буюу ирэх амралтын өдрүүдэд 14.00 цагаас Оскар Уайльдын “Аз жаргалтай ханхүү” жүжгээ толилуулах гэж байна. Ул уран бүтээлийг харааны болон сонсголын бэрхшээлтэй үзэгч, хүүхэд багачууд үзэх боломжтойгоороо онцлог юм.
Найруулагч М.Ариунтуяагийн “Аз жаргалтай ханхүү” жүжиг нь бяцхан үзэгчдэд хийсвэр өнгөц болон бодит үнэлэмжийн талаарх ойлголтыг өгнө. Аз жаргал гэж чухам юу юм вэ, тэр нь хаана байдаг юм бол, хэрхэн аз жаргалд хүрэх тухай өгүүлэх аж.
Голын эрэг дээр зуссан бяцхан хараацай өвөл болохоос өмнө дулаан орныг зорин нисэхээсээ өмнө зунжин дурласан зэгсийг хамт явахыг гуйна. Хараацай зэгсийг яагаад хамт явж чадахгүй байгаа тухайг бодолгүйгээр урамгүйхэн Египетийг зорин нисэж байгаагаар жүжиг эхэлнэ. Тэрбээр замдаа нэгэн хотод саатаж, Аз жаргалтай ханхүүгийн хөшөөтэй тааралдан ярилцаж, түүнд тусалснаар өөрийнхөө жинхэнэ мөн чанарыг олж бусдыг аз жаргалтай болгож байгаа тухай гарах ажээ.
