2009 оны тавддугаар сарын 19-ний өдөр Монголын уран зургийн галерейн уран зургийн сан хөмрөг гал түймэрт өртөж Монголын дүрслэх урлагийн сор болсон 1000 орчим бүтээлүүд галын улмаас гэмтсэн харамсалтай үйл явдал болсон. Галд өртсөн бүтээлүүд нь Монголын түүх, нийгмийн байдал, ахуйн болон байгалийн сэдэвт, хөрөг зургууд, орчин үеийн чиглэлийн бүтээлүүд байсан юм.
Тэгвэл Монголын уран зургийн галерей нь Монгол Улсын орчин цагийн дүрслэх урлагийн түүчээ болсон тэдгээр галд өртсөн үнэт бүтээлийг авран хамгаалах чиглэлээр сэргээн засварлах, сэргээн бүтээлгэх олон талт ажлыг санаачлан хэрэгжүүлсээр ирсэн бөгөөд 2024 онд “AR галерей-Үнэт бүтээлүүд” төслийг санаачлан хэрэгжүүлж, олон нийтэд танилцуулахад бэлэн болжээ. Тус төслийн зорилго нь галд гэмтсэн уран зургийг AR технологийн тусламжтайгаар анхны эх бүтээлээр нь сэргээн үзэх, Монгол Улсын түүх соёлын хосгүй үнэт бүтээлийн дүрүүдтэй бодитоор танилцах боломжийг үзэгчдэд олгох юм. Уг үзэсгэлэнгийн технологийн хөгжүүлэлт болон контент хөгжүүлэлтийн үйл ажиллагааг AR технологи хөгжүүлэгч “AR Mongolia” компани гүйцэтгэсэн аж.
Мөн тус үзэсгэлэнгийн үеэр “Мэдрэхүйн төсөөлөл” төслийг олон нийтэд танилцуулж байна. “Мэдрэхүйн төсөөлөл” төслийг тусгай хэрэгцээт үзэгчдэд урлагийн үйлчилгээг тэгш хүртээмжтэй хүргэх зорилгоор хэрэгжүүлж буй бөгөөд хосгүй үнэт бүтээлийг тусгай орчинд бодитоор гараараа мэдэрч, аудио хэлбэрээр сонсон үзэх боломжтойгоор дэглэсэн юм.
“AR галерей-Үнэт бүтээлүүд” төслийн тусгай үзэсгэлэнг энэ сарын 18-аас ирэх арванхоёрдугаар сарын 5-ныг дуустал зохион байгуулна.
