Монголын спортын оны шилдгийг шалгаруулах “Бөртэ чоно” тэргүүн дээд шагнал гардуулах ёслол энэ сарын 19-нд УДЭТ-т болно. 22 дахь удаагаа болох эл шагнал гардуулах ёслолыг Урлагийн гавьяат зүтгэлтэн, УДЭТ-ийн Ерөнхий найруулагч Ч.Түвшин найруулах аж.
Өмнөх наадмуудыг МҮОХ-ноос зохион байгуулж ирсэн бол энэ удаагийн наадмыг ССАЖЗЯ, Биеийн тамир, спортын улсын хороо, Соёл урлагийн газар, УДЭТ, МҮОХ хамтран зохион байгуулах юм.
Ташрамд дурдахад, Монголын спортын сэтгүүлчдийн санал асуулгаар тодруулдаг “Бөртэ чоно” наадмыг МҮОХ-ны дэд ерөнхийлөгч Ц.Дамдин агсан анхлан санаачилсан нь өнөөг хүртэл тасралтгүй үргэлжилсээр буй юм. 2002 онд шагнал гардуулах ёслолыг анхлан зохион байгуулахад “Бөртэ чоно” цомыг чөлөөт бөхийн ДАШТ-ий хошой мөнгөн медальт, Гавьяат тамирчин О.Пүрэвбаатар хүртэж байв. Харин энэ цомыг хамгийн олон хүртсэн тамирчнаар Олимпын наадмын хүрэл, ДАШТ-ий алт, хүрэл медальт, Хөдөлмөрийн баатар, Гавьяат тамирчин Х.Цагаанбаатар бөгөөд тэрбээр 2004, 2006, 2009 онд “Бөртэ чоно”-ын эзэн болж байжээ.
