Улсын хүүхэлдэйн театрын уран бүтээлчид П.И.Чайковскийн “Хунт нуур” бүжгэн жүжгийн үлгэр, домгоос сэдэвлэн бүтээсэн ижил нэрт хүүхэлдэйн жүжгээ энэ амралтын өдрүүдэд буюу арванхоёрдугаар сарын 14, 15-нд 14.00 цагаас хоёрхон удаа тоглох гэж байна. Улсын хүүхэлдэйн театрын сор болсон бүтээлүүдийн нэг болох энэхүү уран бүтээл нь таваас дээш насны хүүхдүүдийн нас, сэтгэхүйн онцогт тохирсон гэдгээрээ онцлог.
Эрт цагт хар санаат шидтэн хорвоогийн хамгийн гоо үзэсгэлэнт охидыг хулгайлан өөрийн цайздаа хорьдог байжээ. Охидоо алдсан ээжүүдийн сэтгэлийн гуниг зовлонг үгээр илэрхийлэхийн аргагүй. Ийм зовлонд унасан нэгэн эх охиноо хайн явсаар хар шидтэний цайзыг олж ирээд охиноо суллахыг гуйн уйлан хайлан зогссоор. Энэ явдлыг мэдээд охидоо алдсан ээж, аавууд шидтэний цайзыг зорьсон боловч хаягдаж хоцорсон цайз, өмнө нь тогтсон нуур, хэсэг хун шувуудаас өөр юу ч байсангүй. Энэхүү сэтгэл хөдөлгөм түүхийг “Хунт нуур” хүүхэлдэй жүжгээс үзээрэй. Тасалбарыг: https://puppet.mn/event/3034 авах боломжтой.
