2004 онд байгуулагдаж, орчин үеийн хөгжмийн поп, электро урсгалаар уран бүтээлээ сонсогчдод хүргэж явсан “Гала” хамтлагийг сонсогч, үзэгчид андахгүй мэднэ. 2007 хүртэл уран бүтээлээ туурвихдаа 2005 онд “Хөвгүүн”, 2006 онд “Мөрөөдлийн” хос цомгоо гаргаж, эдгээр цомгуудад нь багтсан “Хөвгүүн”, “Уучлаарай, Зулаа”, “Азтай учрал”, “Халаасанд минь чиний зураг” гэхчилэн бараг бүх дуу нь хит болж байв. Түүнчлэн бие даасан тоглолтоо задгай талбайд хийж, тухайн үедээ хамгийн олон үзэгчдийг цуглуулж, цомгоо хамгийн олон хувь борлуулж дээд амжилт тогтоож байлаа.
Тэгвэл тус хамтлагийн 20 жилийн ой энэ онд тохиож буй бөгөөд эл ойдоо зориулан “Гала” хамтлаг уран бүтээлийн ажилдаа эргээд оржээ. Тодруулбал, 20 жилийн өмнөх “Уучлаарай, Зулаа” дуугаа шинэчилж, видео клипээ сонсогчдод хүргээд байна. Ташрамд дурдахад, “Гала” хамтлаг 20 жилийн ойн тоглолтоо ирэх 2025 онд хийхээр төлөвлөөд буй.
