Өнөөдөр Төрийн соёрхолт, “Алдрын од” одонт “Харанга” хамтлагийн дуучин, Гавьяат жүжигчин Х.Лхагвасүрэнгийн мэндэлсэн өдөр. Тэрбээр энэ өдөр буюу 1965 оны арванхоёрдугаар сарын 21-нд мэндэлжээ.
Урлагийн мэдрэмж нь удам дамжсан тэрбээр хоёрдугаар ангийн сурагч байхдаа сургуулийнхаа шинэ жил дээр үлээвэр хөгжимтэй дуулснаас хойш урлагийн замналд эргэлт буцалтгүй татагджээ. 1989 онд 23-хан насандаа “Харанга” хамтлагтай хувь тавилангаа холбосноос хойш өдгөө 35 жил уран бүтээлээ хүргэж явна. Тэрбээр 2014 оны гуравдугаар сард Монгол Улсын Гавьяат жүжигчин цолоор энгэрээ мялааж, түүнээс таван жилийн дараа буюу 2019 онд хамтлагийнхаа 30 жилийн ойгоор хамтлагаараа Төрийн соёрхол хүртсэн юм.
Х.Лхагвасүрэн “Харанга” хамтлагийнхаа уран бүтээлээс гадна хувийн уран бүтээлээ туурвин сонсогчдодоо хүргэсээр буй. Тэрбээр бие даасан анхны цомгоо 2008 онд “Харангын Лхагваа” нэртэйгээр гаргаж, түүнээс хойш “Лхагваа“, “Тэнгэрлэг андууд”, “Нарыг хайрла”, “Замбатив”, “Мөнх хөх тэнгэр”, “Монгол ээж” цомгоо гаргаж, 2011 онд “Нарыг хайрла”, 2013 онд “Морин хуур”, 2014 онд “Толин хул”, “Монгол ээж” тоглолтоо толилуулж байв.
Монголын ард түмний оюун санаа, сэтгэл зүрхэнд хоногшсон онцгой бүтээлүүдийг туурвин Монгол Улсын орчин үеийн хөгжмийн урлагт үнэтэй хувь нэмэр оруулсан түүнд төрсөн өдрийн мэнд хүргэе.
