ОХУ-ын Пермь хотын Балетын сургуульд балетын жүжигчин мэргэжил эзэмшсэн Б.Мөнхнаран 2018 онд сургуулиа төгсөөд УДБЭТ-аар овоглож, эл театрын тайзнаа П.И.Чайковскийн “Хунт нуур”, “Цөмөөхөй”, Ф.Херольдын “Дэггүй лиз”, А.Аданы “Жизель”, Ж.Чулууны “Уран хас”, Х.Алтангэрэлийн “Төгсгөлгүй танго”, Л.Минкусийн “Дон Кихот”, “Пахита”, А.Хачатуряны “Спартак”, Л.Делибийн “Коппелия”, Б.Асафьевын “Бахчисарайн оргилолт булаг”, Э.Чойдогийн “Чойжид дагина”, И.Морозовын “Амттаны доктор” зэрэг дэлхийн сонгодог болон үндэсний балетад гол болон туслах дүрүүдийг бүтээжээ. Түүнчлэн Б.Мөнхнаран сүүлийн жилүүдэд дэлгэцийн уран бүтээлүүдэд ч чадварлаг тоглож буй. Тухайлбал, залуу найруулагч Б.Нямтөрийн “Цаггүй амьдрал”, Б.Энхжаргалын “Чи өөрөө хайр”, “Absolute” пикчерсийн найруулагч П.Дэлгэрбаярын “Тойрог” гэх зэрэг уран сайхны кинонд тоглосон юм. Харин тэрбээр яг одоо үзэгчидтэй “Амьдрах сайхан” олон ангит киноны гол дүрээр “уулзаж” байна. Эл цувралыг долоо хоног бүрийн даваа, мягмар гарагт “Боловсрол” телевизээр, мөн “Юнивишн”-ий монгол багц, “LookTV”-ийн Nomadia Originals цэс, “Ddish”-ийн монгол кино 807 сувгаас түрүүлж үзэх боломжтой.
