Монгол Улсын Ерөнхийлөгч У.Хүрэлсүх Бүгд Найрамдах Турк Улсад төрийн айлчлал хийж буй. Энэ хүрээнд үндэсний соёл, урлагийн гайхамшигт өвийг дэлгэн харуулах “Монголын сайхан орон” тоглолтыг Истанбул хотноо зохион байгууллаа.
Тус тоглолтод морин хуурын найрал, үндэсний болон дэлхийн сонгодог урлагийн шилдэг бүтээлүүдийг толилуулж, тал нутгийн нүүдэлчдийн соёлын өв, урлагийн уран сайхны гайхамшгийг евроазийн эх газрын ард түмэнд сурталчилсан байна.
Энэ үеэр БНТУ-ын Соёл, аялал жуулчлалын дэд сайд Сэрдар Чамтай уулзаж, хоёр орны соёлын харилцааг өргөжүүлэх, “Монгол хаан” жүжгийг Туркт толилуулах боломжийн талаар ярилцаж, цаашдын хамтын ажиллагааны тодорхой чиглэлүүдийг хэлэлцжээ.
Мөн “Монголын сайхан орон” тоглолтод хүрэлцэн ирсэн Турк улсад сурч, хөдөлмөрлөж буй монголчууддаа болон соёлын өвийг түгээн дэлгэрүүлж, хоёр орны найрсаг харилцааг улам бэхжүүлэх үйл хэрэгт хувь нэмэр оруулж буй нийт уран бүтээлчдэдээ талархал илэрхийлье гэж Соёл, спорт, аялал жуулчлал, залуучуудын яамнаас мэдээллээ.
