Монголын угсаатны зүйн гэр музейг үүсгэн байгуулагч, цуглуулагч О.Маш-Эрдэнийн “Дүрслэх урлагийн цуглуулга” ном худалдаанд гарчээ.
1991 оноос эхлэн өөрийн хүүхэд насны зураг зурах сонирхол болон Монгол өв соёлыг хадгалах, хамгаалах, уламжлуулах эрмэлзлээр уран зураг, монголчуудын өдөр тутмын аж амьдрал, шашин шүтлэгт холбогдох эд өлгийн зүйлс, бүтээлүүдийг цуглуулж эхэлсэн О.Маш-Эрдэнэ эрхэмийг Монголын галерей, музейн салбарыхан болон цуглуулагч, урлагийн бүтээл сонирхогчид, зураач уран бүтээлчид андахгүй. Тэрбээр урлагийн бүтээл цуглуулахаас гадна тэдгээрийгээ олонд нийтэд үзүүлж, Европын хотуудад үзэсгэлэн, арга хэмжээ зохион байгуулж, Монгол өнгө аястай урлагийг таниулах ажилд хувь нэмрээ оруулсан эрхэм юм.
Түүний дүрслэх урлагийн бүтээлийн цуглуулга нь 60 гаран уран бүтээлчийн 300 хол давсан бүтээлүүдээс бүрдэх ба нэг зураачийг эсвэл нэг өнгө аяс, үзэл санааг чиг баримжаа болгон цуглуулахаас илүүтэйгээр тухайн цаг үеийн сор уран бүтээлчдийн бүтээлээс түүвэрлэн цуглуулснаараа онцлогтой. Түүний зэрэгцээ тухайн үед гарч ирж байсан залуу уран бүтээлчдийг дэмжих хүслээр тэдний бүтээлийг худалдан авч байсныг тус цуглуулгаас тодорхой харж болно.
Үүнд, Монголын орчин үеийн урлагийн томоохон төлөөлөгч, Төрийн соёрхолт, Ардын зураач Ш.Чимэддоржийн бүтээлээс эхлээд Монголын контемпорари урлагийн үзэл санааны анхдагчдын нэг зураач Ё.Далх-Очир, олонд “Тайгын Нацагаа” хэмээн танил болсон байгалийн зураач Б.Нацагдорж болон графикийн зураач З.Уянга, реалист зургийн томоохон төлөөлөгч Ц.Батжаргал нарын сор болсон олон уран бүтээлчдийн бүтээл тус цуглуулгад бий.
“Дүрслэх урлагийн цуглуулга” номонд 60 гаруй зураачдын 300-д уран зураг, Монгол зураг, чимэглэлийн ажлууд, судалбар бүтээлүүд багтжээ. Эдгээр бүтээлүүд 1990 оноос хойших ардчилсан нийгэм байгуулж яваа Монгол Улсын нэн шинэ үеийн уран зургийн ээдрээтэй замналын эхлэл, хөгжин хувьсаж ирсэн эрэлхийлэл, зам мөрийг тодруулах, харьцуулан судлах, уран зураг сонирхсон хэн бүхэнд чухал цомог ном болох юм.
Тус номыг “Интерном” номын дэлгүүр болон “Монгол” арт галерейгаас худалдан авах боломжтой.
