“Монсудар” хэвлэлийн газрын хүүхдийн номын “Жангар” редакц уншигчдадаа “Эх орон” танин мэдэхүйн зурагт номоо хүргэх гэж байна. Тус номын зохиолчоор Б.Батцэцэг, Б.Чанагнянгар, Такахаши Кимико зураачаар Э.Базаррагчаа нар ажиллажээ.
“Эх орон” зурагт ном нь монгол нутагт үлэг гүрвэл идээшиж байсан үеэс өнөөдрийг хүртэл өрнөсөн түүхийг өгүүлэх юм. Тиймдээ ч хүн төрөлхтөн хэрхэн үүсэж хөгжсөн тухай, бид яаж дэлхийн олон улс, хүмүүсийн дундаас ялгарч улс эх орноо байгуулсан болох, бидний хэл, соёл болоод “өнөөдөр” хэрхэн бүрэлдэн тогтсон бэ зэрэг олон асуултад хариулна.
Өнөөгийн өдөр тутмын амьдралын хурдан хэвшил дунд хүмүүс эх орны тухай төдийлөн анхаарч, яриа өрнүүлдэггүй. Гэвч хүүхэдтэйгээ энэ тухай үргэлж ярилцаж, асууж байх учиртай юм. Тиймийн учир монголд анх удаа “Эх орон”-ы тухай цогц агуулга бүхий зурагт номыг ийнхүү бүтээжээ.
