XVII жарны “Хөхөгчин” хэмээх модон могой жилийн Сар шинийн баяр энэ долоо хоногт тохионо. Эдгээр өдрүүдэд Монголын үндэсний олон нийтийн радио, телевиз Сар шинийн баярт зориулан үндэсний агууламжтай 30 орчим нэвтрүүлэг, хөтөлбөрийг бэлтгэн үзэгч олонд хүргэхээр ажиллаж байна.
Тухайлбал, Сар шинийн өдрүүдэд үзэгчдийн үздэг 21 аймгийн нийгэм соёлын онцлогийг илэрхийлсэн “Монгол түмний мэнд” нэвтрүүлэг, уралдаант цэнгээнт “Дөрвөн бэрх”, хөгжимт театруудын уран бүтээлчдийн оролцсон “Сувдан өргөө” нэвтрүүлэг, “Зүүдэлсэнгүй явлаа” теле зохиомж, “Зул алдар хаан” тууль зэрэг нэвтрүүлгийг бэлтгэн хүргэх аж. Түүнчлэн, МҮОНТ-ийн уран бүтээлчид Дорноговь, Өмнөговь, Увс, Завхан зэрэг аймгаас Сар шинийн баярт зориулан нэвтрүүлэг бэлтгэн хүргэх гэж буй юм байна.
Мөн “Хичээлийн дараа”, “Хөгжилтэй үсгүүд”, “Монгол өв соёл” нэвтрүүлгийн хүрээнд Сар шинийн гоёл хурган дотортой дээл, битүүлэх ёс, Буурийн голын хос зогдорт, “Монголчуудын эрхэмлэн дээдлэх үнэт зүйл”, “Занабазар ба Цагаан сар” нийтлэл, нэвтрүүлэг “Чөргөөлгөн цагаан аялгуу” Алтай ятгын концерт, “Зул алдар хаан” тууль цуврал, “MNB Live music”, “Монгол түмний мэнд” зэрэг нэвтрүүлгийг үзэгчдэд хүргэх ажээ.
