ОХУ-ын “Москвагийн дуудлага худалдааны төв”-өөс энэ сарын 16-нд уран зургийн маш том дуудлага худалдаа зохион байгуулах гэж байна. Нийт 140 бүтээл худалдаанд тавигдсаны дотор Марк Шагал, Карл Брюллов, Илья Репин, Иван Айвазовский, Н.К.Рерих нарын уран зураг байна.
Хамгийн үнэтэй зураг нь Виктор Васнецовын “Богомольцы” бөгөөд 150 сая рублиэс худалдаа эхэлнэ. Мөн Иван Айвазовскийн “Пейзаж с волами” үнэд хүрэх бололтой. Учир нь Айвазовский бол тэнгис, далайн зургаараа алдаршсан тул өөр сэдэвтэй бүтээл нь үнэлэгдэх учиртай гэнэ.
Энд Монголтой холбоотой нэгэн бүтээл байгаа нь Оросын их зураач, философич, сэтгэгч, зохиолч, аялагч, археологич, нийгмийн зүтгэлтэн Николай Константинович Рерихийн “Монголия. Камни и юрты” уран зураг байна. 500 мянган рублиэс эхлэн дуудлага худалдаанд орох тус зургийг Рерих 1926-1927 онд Монголд аялж байхдаа зуржээ.
