“Ворлд оф лэнгвиж” ХХК-иас энэ гуравдугаар сарын 20, 21-нд олон улсын уран зохиолын өдөрлөг зохион байгуулах гэж буй. Эл өдөрлөгт Их Британийн алдартай зохиолч Энтони Хоровитц тэргүүтэй зохиолчид оролцох аж.
Триллер, нууцлаг адал явдалт зохиолоороо алдартай Энтони Хоровитц нь алдартай номын цувралууд болон “Foyle’s War” (BBC), “Midsomer Murders” зэрэг олон ангит телевизийн шоуны зохиолыг бичсэн уран бүтээлч юм.
Түүний алдартай бүтээлүүдээс дурдвал, “Alex Rider” цуврал (2000-одоо), “Stormbreaker” (2000), “Point blanc”, “Skeleton key” зэрэг ботиудыг нь нэрлэж болно. Түүнчлэн “The Power of five” (Pentagram) цуврал, Артур Конан Дойлын өв залгамжлагчдаас албан ёсны зөвшөөрөл авч бичсэн “The House of silk” (2011) болон “Moriarty” (2014) зохиолууд, Иан Флемингийн Жеймс Бонд-ын зохиолуудыг үргэлжлүүлэн бичсэн “James Bond – Trigger Mortis” (2015), “Forever and a day” (2018) зэрэг зохиолуудаар нь уран зохиолд дурлагсад андахгүй.
“Ворлд оф лэнгвиж” ХХК-иас зохион байгуулах олон улсын уран зохиолын өдөрлөгийн талаарх мэдээллийг албан ёсны фэйсбүүк хуудсаас нь авах боломжтой.
