Эдинбургийн шилтгээн
Гүнжийн гудамжны баруун төгсгөлд нэгэн үзэсгэлэнт шилтгээн сүндэрлэнэ. Харин тус шилтгээн байрлах хадан цохио үгүй байсан бол Эдинбург өдийг хүртэл оршин тогтнохгүй байсан гэдэг. Уг хадархаг толгод нь төв Шотланд, Англи хоёрын байлдан дагуулалт, нэг, хоёрдугаар зууны Ромын цэрэг арми, 1745 оны Хунтайж Чарлигийн эзэрхийлэл гэх мэт тоолж барамгүй дайралтаас аврагдаж үлдсэн түүхтэй. Эдинбург шилтгээн нь Шотланд улсын Эдинбург хотын галт уулын чулуулгаас үүссэн хадан дээр байрладаг. Дэвид хааны үе буюу XII зууны үеийн энэхүү цайз нь 1603 оны их хаадын үе хүртэл эрхэмсэг дээдсийн өргөө байсан ажээ. Харин үүнээс хойш хотыг хамгаалах цэргийн баазаар ашиглагдаж байсан байна. Шотландын вант улсын түүхэн дурсгалт цайзуудын нэг тус шилтгээн нь XIX зуунаас түүхэн дурсгалт дүрээрээ олонд танигдаж, сэргээн засварлах ажлууд эхнээсээ хийгдэж эхэлжээ. Өнөөдөр тус шилтгээнд эзэн хааны сүр жавхлант эдлэл хэрэглэлүүд болон Шотланд үндэсний дайны музей байдаг.
Стирлинг шилтгээн
Стирлингийн шилтгээнийг авч үлдэж чадвал Шотланд оршин тогтносоор байх болно гэж хэлдэг байсан нь тус цайз балар эртний үед баригдсан болохыг баталдаг байна. Төв Шотландын Стирлинг шилтгээний байрлал, уран барилгын хийц, түүхэн ач холбогдол нь мартаж зүрхлэмгүй сүрдэм мэдрэмжийг төрүүлнэ . Хэн ч үл хүрэх өндөр хадан дээр байрлах тус цайзын хамгаалалт бүхий огцом хавцал нь ой модоор бүрхэгдсэн байдаг аж. Стирлинг шилтгээнд Шотландын хатан хаан Мэри тэргүүтэй цөөнгүй хаан, хатан сүр жавхлангаа бадруулан титэмээ зүүж байсан билээ.
Kрэгивар шилтгээн
Шотландын тайж хийцийн сонгодог жишээ Kрэгивар нь тус хэсгийнхээ хамгийн сонирхол татсан шилтгээн бөгөөд XVII зууны үед баригдсан ч өнөөг хүртэл өөрчлөгдөлгүй унаган төрхөө хадгалж үлджээ. Шилтгээний доод хэсэг нь цулгуй хана байх хэдий ч дээд хэсэг нь цамхаг хэлбэрийн шовх оройтойгоос гадна дайны үеийн хурц ирмэг бүхий хамгаалалтын ханатай.
Калейн шилтгээн
Шотланд Үндэсний Итгэлцэл байгууллагын Эйршир дэх энэхүү цайз руу гинжээр татаж буулгах зориулалттай дүүжин гүүрээр дамжина. Хадны орой дээр байрлах тус цайз холоос зэрэглээ мэт агаарт хөвсөлзөн харагддаг ажээ. Калейн шилтгээн нь XVIII зуунд хадны ирмэг дээр баригдаж байжээ. Тансаг хийцийн өвөрмөц тус харшид хоёр ч мөсөн байшин байдгаас гадна хун шувуу хөвдөг цөөрөм, жүржийн цэцэрлэг, буга урамдаж, шувууд жиргэх цэцэрлэгт хүрээлэнтэй ажээ.
Эйлен Донан шилтгээн
Шотландын уулархаг хойд хэсэгт Эйлен Донан шилтгээн орших боловч арлын эрэгээс багагүй зайтай. Өвөрмөц байрлалтай тус шилтгээн нь нум хэлбэрийн чулуун гүүрээр эх газартай холбогдсон байдаг нь үлгэр эндээс эхлэлтэй гэдгийг харуулна. Тус улсын түүхэн ач холбогдолтой томоохон цайзуудын нэг учир уг цайзад киноны уран бүтээлчид зурагт авалт хийх нь элбэг байдаг байна. Мөн тус шилтгээн нь Шотландын гурван нуур уулздаг цэг дээр оршдог учир хамгийн романтик шилтгээнд тооцогддог. Эйлен Донан чухам хэзээ баригдсан нь тодорхойгүй ч эрдэмтэд арван зууныг элээсэн байх магадлалтай гэж үздэг аж. Гэвч олон хүн шилтгээнийг дөнгөж зуун жил болох гэж байгаа болов уу хэмээн таамагладаг байна.
www.URLAG.mn
