“Чингис хаан” одонт, Монгол Улсын Гавьяат жүжигчин, дуурийн дуучин Г.Ариунбаатар оны шилдэг дуучин шагналын эзэн болжээ. Тодруулбал, ОХУ-ын Каста Дивагийн нэрэмжит дуурийн шагналын Оны шилдэг дуучин номинацийн эзнээр Г.Ариунбаатар тодорсон байна.
“Каста Дива” хэмээх шагналыг 1996 онд дуурийн урлагийн 400 жилийн ойг тохиолдуулан үүсгэн байгуулжээ. Эл шагналыг нь жил бүр дуурийн урлагт гаргасан гарамгай амжилтыг үнэлэн олгодог бөгөөд шүүгчдийн бүрэлдэхүүнд нэрт хөгжмийн зохиолчид, шүүмжлэгчид багтдаг байна.
Өнөө жил энэхүү шагналыг Г.Ариунбаатарт олгохдоо түүний Мариинский театрын тайзнаа бүтээсэн дүрүүд болон алдарт Большой театрт Ж.Вердийн “Риголетто” дуурийн шинэ хувилбарын гол дүрийг бүтээснийг үнэлэн олгосон бөгөөд мөн дотоод болон гадаадын уран бүтээлүүдэд бүтээсэн дүрүүдийг нь ч багтаасан аж.
Ташрамд дурдахад, Ж.Вердийн “Риголетто” дуурийн шинэ хувилбарыг дөрөвдүгээр сарын 25-27-нд Большой театрын аялан тоглолтын хүрээнд Санкт-Петербургт Мариинскийн тайзнаа үзэх боломжтой аж. Г.Ариунбаатар өнгөрсөн жилийн сүүлийн улиралд л гэхэд “Марийнский” театраасаа гадна алдарт Большой театр, Франц улсын Гренобль хотын театр, Парис хотын филармонийн тайзнаа урилгаар дуулжээ. Харин гурав, дөрөвдүгээр сард Францын Лион хотын Дуурийн театрт Ж.Вердийн “La forza del Destino” дуурьт Дон Карлогийн дүрд дуулаад буй аж.
